@juzmedia: Атырау облысында болған резонансты кісіні өлтіру ісі бойынша халықаралық іздеуде жүрген күдікті Индонезияда қолға түсті. ҚР Ішкі істер министрлігінің мәліметінше, қазақстандық құқық қорғау органдары шетелдік әріптестерімен бірлесіп, 29 жастағы Сұлтан Сәрсемәлиевті Ломбок аралындағы Сенару ауылында ұстаған. Күдікті Индонезияның Солтүстік Ломбок аймағындағы қонақүйлердің бірінде жасырынған. Операция 24 ақпанда Интерполдың «қызыл бюллетені» және Атырау қалалық сотының 2026 жылғы 8 қаңтардағы қаулысы негізінде жүргізілген. Солтүстік Ломбок полициясының бастығы Агус Пурванта жергілікті БАҚ-қа берген сұхбатында бұл шара халықаралық үйлестіру нәтижесінде жүзеге асқанын атап өтті. Оның айтуынша, күдікті қашуға әрекет жасағанымен, жедел топ оны еш қарсылықсыз ұстаған. Күдіктімен бірге оның бұрынғы жұбайы – 30 жастағы Ақбаян Мұқанғалиева да анықталған. Бұған дейін ол да із-түзсіз жоғалғандар қатарында болған.
