#काठमाडौँ। नेपाल आदिवासी जनजाति महासङ्घ जिल्ला परिषद् सचिवालय चितवनले राष्ट्रिय स्वतन्त्र पार्टी (रास्वपा)की नेतृ सोविता गौतमले दिएको अभिव्यक्तिलाई लिएर गम्भीर आपत्ति जनाएको छ। सोमबार महासङ्घका अध्यक्ष सागर कुमालद्वारा जारी प्रेस विज्ञप्तिमा चितवन क्षेत्र नम्बर ३ की प्रतिनिधि सभा उम्मेदवारसमेत रहेकी गौतमले हालै एक चुनावी सभामा व्यक्त गरेको धारणा आदिवासी जनजाति समुदायप्रति अपमानजनक र भ्रामक रहेको उल्लेख गरिएको छ। विज्ञप्तिअनुसार गौतमले आफ्नो सम्बोधनका क्रममा चितवनका आदिवासी जनजाति, विशेषतः गुरुङ र थारु समुदायलाई लक्षित गर्दै ‘पैसाले किन्न सकिने’ तथा ‘बिक्न सक्ने’ वर्गका रूपमा टिप्पणी गरेकी थिइन्। महासङ्घले उक्त अभिव्यक्तिलाई समुदायको स्वाभिमानमाथि आघात मात्र नभई उनीहरूको राजनीतिक चेतना र विवेकमाथिको गम्भीर प्रहारका रूपमा व्याख्या गरेको छ। अध्यक्ष कुमालले हस्ताक्षर गरेको विज्ञप्तिमा गुरुङ र थारु समुदायलाई ‘सोझो’ र ‘पैसामा बिक्ने’ भनेर चित्रण गर्नु उम्मेदवारको सङ्कीर्ण तथा नश्लवादी सोचको प्रतिविम्ब भएको उल्लेख छ। साथै, आदिवासी जनजाति समुदाय कुनै प्रलोभनमा पर्ने समूह नभई आफ्नै ऐतिहासिक पहिचान र गौरव बोकेको सचेत नागरिक समाज भएको दाबी गरिएको छ। मतदातालाई ‘पैसा दिए लिनु’ भन्ने प्रकारको अभिव्यक्ति निर्वाचन आचारसंहिताविपरीत र लोकतान्त्रिक मूल्य–मान्यतामाथिको उपहास भएको भन्दै महासङ्घले गौतमलाई २४ घण्टाभित्र चितवनका सम्पूर्ण आदिवासी जनजाति समुदायसँग सार्वजनिक रूपमा क्षमायाचना गर्न तथा लिखित स्पष्टीकरण दिन माग गरेको छ। महासङ्घले सम्बन्धित उम्मेदवार र दलले गल्ती स्वीकार नगरेको अवस्थामा चितवन क्षेत्र नम्बर ३ का सबै संयन्त्र परिचालन गरी चुनावी बहिष्कारसहित सशक्त आन्दोलन अघि बढाउने चेतावनी पनि दिएको छ। विज्ञप्तिमा सम्भावित परिस्थितिको सम्पूर्ण जिम्मेवारी उम्मेदवार र उनको दलले वहन गर्नुपर्ने उल्लेख गर्दै ‘स्वाभिमान र पहिचानमा खेलबाड स्वीकार्य नहुने’ स्पष्ट गरिएको छ। - @coolman_100_100