📍 #حومة_الطليان… حومة كانت تعج بالحياة قبل الخراب لي راه يبان اليوم في هذا الفيديو، كانت حومة الطليان مثلها مثل العديد من احياء المدينة القديمة في قلب Skikda تعجّ بالحياة. الأزقة كانت عامرة بالناس، والأطفال يلعبو طول النهار، وصوت الجيران والضحك ما كانش يغيب. البيوت ما كانتش غير بنايات… كانت حكايات عائلات وناس عاشو هنا سنوات طويلة، وكل دار عندها قصة وذكرى. الدكاكين كانت عامرة بالحركة، وكل واحد فينا يتفكر أصحابها دكان بدكان، وكأنهم مازالو محلولين إلى اليوم. نتفكرو مثلًا دكان #عمي_علي، و #صالح_درياسة، و #العربي_الحلاق، و قبله #عمي_احمد_اللبان و و … وأكيد كاين ناس آخرين أنتم تتفكروهم أكثر منا. نتفكر آخر شهر رمضان عاشتو الحومة بهذيك الأجواء، تقريبًا في سنوات 1993 أو 1994… وقتها المكان كان مليان حياة: الناس داخلة خارجة، ريحة الماكلة والكسرة في الأزقة، والناس تتلاقى كل يوم وكأن الحومة عائلة وحدة. اليوم، بعد ما تدهورت البنايات وتم ترحيل السكان، ولات الحومة فارغة… بصح الذكريات ما زالت عايشة في قلوب لي كبرو هنا. هذا الفيديو مجرد لحظة توثق الفرق بين بكري كي كانت الحومة عامرة بالناس… ودرك بقات غير الذكريات. ✍️لي عاش فالاحياء القديمة ولا عندو ذكريات فيها، يكتبنا في التعليقات واش يتفكر… يمكن نرجعو شوية من ذاك الزمن الجميل♥♥ - @skikda_news21