@juzmedia: Мұсылман қауымы үшін қасиетті саналатын Қадір түні биыл 16 наурыздан 17 наурызға қараған түнге сәйкес келеді. Бұл туралы Қазақстан мұсылмандары діни басқармасы жариялаған діни күндер кестесінде көрсетілген. Қадір түні (Ләйләт әл-Қадр) исламдағы ең қасиетті түндердің бірі саналады. Діни деректерге сәйкес, дәл осы түнде қасиетті Құран түсе бастаған. Сондықтан мұсылмандар бұл түнді құлшылықпен өткізуге ерекше мән береді. Ислам ғұламаларының айтуынша, Қадір түнінде жасалған құлшылықтың сауабы мың айдан да артық. Сол себепті бұл түні мұсылмандар мешітке барып намаз оқуға, Құран оқуға, дұға жасап, тәубе етуге және садақа беруге тырысады. Дәстүр бойынша Қадір түні қасиетті Рамазан айының соңғы он күнінің бірінде болады. Көпшілік ғалымдар оны Рамазан айының 27-түнімен байланыстырады. Айта кетейік, 2026 жылы Рамазан айы 19 наурызда аяқталады. Ал Ораза айт 20 наурызда атап өтіледі.
