أنا لمن عرستها كانت صغيرة وصغيرة شديد، وكنت خايف منها جداً، كيف حأتعامل معاها؟😴 حتقولوا لي عرستها لي من البداية، حأقول ليكم كنت حبيس للعادات والتقاليد القبلية، كنت ما بقدر أقول لا، لأمي وأبوي.. قعدوني قدامهم الاتنين وحوليني أعمامي واخواني الأكبر مني الشربو من نفس الكأس دي.. قالوا لي بعبارة واحدة ((أنت حتعرس فلانة)).. وواصلو في كلامهم، حنشوف يوم مناسب في الشهر دا تعقد فيو، كنت عاوز اسأل الف سؤال بس ما قدرت اتجمدت! اقلاها ما قدرت اقول فلانة منو وما عرفت في لحظتها اركز عشان اعرف هم قاصدين منو! جيت لأمي وقلت ليها دي منو؟ قالت لي دي البت الانت مستحيل تلقى زيها، خلقة وأخلاق واحترام ودوبه خلصت الثانوية، يعني حقيقي حتكون أمثل بت ليك❤️ انا بقيت مهجوم جداً، كيف المثالية بتتمثل فيها عشان هي خلصت الثانوية، طيب وانا حتعايش معاها كيف وانا حتى ما شفتها للآن، ولنفترض اني شفتها، حاتقبلها كيف وانا ما حأكون عارف عنها شيء بتاتاً.. اتلخمت شديد وانا بفكر في الموضوع دا لدرجة ما حسيت انو يوم العقد فاضل ليو اسبوع على بت قدرت اشوفها تلاتة مرات في حياتي كلها.. اتزوجت يا عالم بكل بساطة الدنيا وسهولتها وعملت ليها عرس انا ذات نفسي ما كنت متخيلو لأني كنت واعد نفسي انو البت الحأعرسها لازم أعزها، حتى لو ما كنت متوقع انو عرسي يكون كدا بس دا وعد والوعد دين علي❤️ بصحى وأنا خايف منها، خايف اتكلم معاها وخايف اضحك معاها وخايف حتى اعاين في عيونها، البت صغيرة علي لدرجة اني خفت نفسيتها تتغير وهي معاي أو اسبب ليها مرض نفسي😴 بس عارفين! غيرتني 180درجة، فجأة بتصحيني الساعة 3:00 صباحاً بصحى وأنا مخلوع ومفتكر حصلت ليها حاجة، تقول لي أرح نصلي، انا في البيت كنت بصلي براي عشان متعودة بس هسي خايفة وما قادرة اتعود على البيت دا.. اقوم وانا كلي استغراب واصلي معاها وندعي واقول ليها نرجع ننوم تقول لي لا ننتظر الصبح! نحن على الحالة دي إلى الآن ❤️ بجيب ليها الخضار والفواكه واي حاجة وبملى التلاجة وبدخل المطبخ اقول أحاول اساعدها، بتطردني! وبعد مناقرة شديدة، وهي دائماً بتفوز في المناقرات والنقاشات لأنها عنيدة..والغريب بلقاها عملت ما لذ وطاب❤️ بقول لنفسي هي اتعلمت متين في العمر دا؟ جبتها وقعدتها وقلت ليها انو مفترض بعد ما نتيجتك ظهرت تنزلي جامعة، وريني عاوزة ياتو جامعة وتخصص وانا حأنزلك، قالت لي لا!! قلت ليها كيف لا؟ قالت ما عاوزة تواصل قراية عاوزة تعيش في بيتها ومع راجلها واولادها، قلت يمكن عشان أهلها فهموها كدا، قلت ليها يا بت الناس انا حأقريك ما تشيلي هم وانا راضي تماماً بانك تقري والله❤️ قالت لي انا الراضية تماماً بحياتي كدا، شهادتي الثانوية بتكفيني عاوزاك تعرف انو عقلية لعقلية بتفرق.. انا عارفة أهمية القراية وأهمية الشهادة وكل حاجة، بس انا ما عاوزة اواصل اقرأ، انا عاوزة اكون موجودة في بيتي ومعاك ولمن نجيب اولاد أعرف اهتم بيهم، اذا غيري بتقدر توازن بين حياتها وأهلها وبيتها وكمان الجامعة، دا ما فرض اني كمان لازم اقدر، انا ما بقدر ولا عاوزة اقدر، عاوزة افضي نفسي ليك ولأولادي وحأفتح بزنسي الخاص واقعد في بيتي وبينكم ❤️.. البت دي دخلتني مدرسة إلى يومنا هذا ما قادر اطلع منها، ماف حاجة بتعملها غلط او بمعنى تاني ما بتغلط علي ولا بقدر حتى اغلط عليها حتى لو عاوز، اي حاجة بتعملها على أكمل وجه وكأنها ملاك ما بتعب ولا بكسل ولا بزهج!❤️ هي بس بتعمل البتحبو هي حقيقي..❤️ وأنا داخل على بيتي بعد تلاتة سنة وبناتي الاتنين جاريين علي، وهي واقفة بتعاين من باب الصالون تشوف الفتح الباب، اتذكرت كلام ناس بيتنا ((انها حتكون أمثل بت لي❤️)) عاوز اقول ليها ((والله لو كان الحب رجلاً، لأوقفته امامك لينحني لكِ، ولو كانت المشاعر من نساء العالمين لطلبتُ منهن أن يتعلمن منكِ الحب❤️))#مشاهير_تيك_توك_مشاهير_العرب #جخو،الشغل،دا،يا،عالم،➕_❤_📝✌️🌍🦋 #مليون_مشاهدة❤ #سودانيز_تيك_توك_مشاهير_السودان🇸🇩 #الشعب_الصيني_ماله_حل😂😂🙋🏻‍♂️ - @twis_ta5