@karakiya_ms: Құрықтағы әз-Наурыз! Бүгін Қарақия ауданының орталығы-Құрық ауылында Ұлыстың ұлы күні Наурыз мерекесі кең көлемде аталып өтті. Көктемнің келуімен бірге табиғат түлеп, тіршілік атаулы жаңарған шақта ұйымдастырылған бұл шара халықтың рухани жаңғыруымен үндесіп, ерекше мазмұнға ие болды. Наурыз-тамыры тереңге тартқан, мыңдаған жылдық тарихы бар ұлық мереке. Оның бастауы ежелгі түркі және иран халықтарының күн мен түн теңелетін кезеңді жаңа жылдың басы ретінде қабылдауынан өрбиді. Бұл күн-табиғаттың жаңарып, тіршіліктің қайта жанданатын шағы ғана емес, адамдар арасындағы татулық пен кешірімнің, мейірім мен ізгіліктің салтанат құратын мезеті. Қазақ халқы үшін Наурыз – ырыс пен ынтымақтың, береке мен бірліктің символы саналады. Кеңес дәуірінде ұмыт қала жаздаған бұл мереке тәуелсіздікпен бірге қайта жаңғырып, ұлттық құндылықтарымыздың ажырамас бөлігіне айналды. Осы тарихи мәні терең мейрам Құрық ауылында да жоғары деңгейде ұйымдастырылды. Ауыл алаңында концерттік бағдарлама ұсынылып, өнерпаздар әуелете ән шырқап, күмбірлете күй төкті. Сахна төріндегі әрбір өнер иесінің өнері көрермен көңілін тербеп, ұлттық мәдениеттің байлығын айқын көрсетті. Мерекенің көркін қыздырған киіз үйлер тігіліп, олар қазақ халқының дәстүрлі тұрмысын танытатын мәдени кеңістікке айналды. Ақ дастархан жайылып, тұрғындарға наурыз көже мен ұлттық тағамдар ұсынылды. Сонымен қатар, ұлттық спорт түрлерінен ұйымдастырылған жарыстар көпшіліктің қызығушылығын арттырды. Күш пен ептілік сыналған сайыстар жастарды жігерлендіріп, ата дәстүрдің өміршеңдігін дәлелдеді. Мерекенің тағылымды тұстарының бірі-ауыл ақсақалдарының ақ батасы. Ел ағалары көпшілікке ізгі тілектерін арнап, бірлік пен татулықтың қадірін ұлықтады. Осылайша, Құрық төрінде аталып өткен әз-Наурыз-елдің бірлігі мен берекесін айшықтаған, рухани құндылықтарды жаңғыртқан тағылымды мереке болды. Ұлыстың ұлы күні барша жұртқа құт-береке, ырыс пен ынтымақ әкелсін! Әр шаңыраққа бақ-дәулет дарып, ақ молайсын, жылымыз жарқын, болашағымыз баянды болсын! Наурыз құтты болсын! ҚАРАҚИЯ АУДАНЫ ӘКІМДІГІНІҢ БАСПАСӨЗ ҚЫЗМЕТІ #DigitalNauryz #Наурыз2026

Қарақия мәдениет-спорт

Open In TikTok:

Region: KZ

Sunday 22 March 2026 08:03:20 GMT