មហាសង្ក្រាន្តឆ្នាំមមី អដ្ឋស័ក ពុទ្ធសករាជ ២៥៧០ គ្រិស្តសករាជ ២០២៦ មហាសករាជ ១៩៤៨ ចុល្លសករាជ ១៣៨៨ សុភមស្តុ ! វរមង្គលាជយាតិរេកព្រះពុទ្ធសករាជព្រះសាសនាអតិក្កន្តា កន្លងទៅហើយបាន ២៥៦៩ ត្រឹមថ្ងៃ សុក្រ១៥កើត ខែពិសាខ លុះដល់ថ្ងៃសៅរ៍១រោច ខែពិសាខឆ្នាំមមី អដ្ឋស័កតទៅ ចូលពុទ្ធសករាជ២៥៧០។ នឹងគណនាឆ្នាំមមីឥឡូវនេះសង្ក្រាន្តចូលនៅថ្ងៃអង្គារ១២រោចខែចេត្រ ត្រូវនឹង ថ្ងៃទី១៤ ខែមេសា គ្រិស្តសករាជ២០២៦ វេលាម៉ោង១០និង៤៨នាទីព្រឹក។ ពេលនោះ ព្រះអាទិត្យចេញពីមីនរាសីទៅឋិតនៅឯមេសរាសី តាមផ្លូវគោវិថី គឺផ្លូវកណ្តាលមាន ទេវធីតាមួយព្រះអង្គជាមគ្គនាយិកាព្រះនាម រាក្យសាទេវី ជារាជបុត្រីទី៣នៃកបិល មហាព្រហ្ម គង់នៅចាតុម្មហារាជិកា ទ្រង់អម្ពរពណ៌ ខ្មៅ លម្អនៅព្រះកាណ៌ដោយសៀតផ្កាបុទុម(ផ្កាឈូក) អភរណៈ កែវមោរា (ត្បូងសមុទ្រពណ៌លោហិត)ភក្សាហារទ្រង់ សោយលោហិត (ផឹកឈាមស្រស់)ព្រះហស្តស្តាំ ទ្រង់ ធនុ (ធ្នូ)ព្រះហស្តឆ្វេង ទ្រង់ត្រីសូល៍ (លំពែងមុខ៣)ទ្រង់គង់ឈរបើកព្រះនេត្រលើខ្នងអស្សតរ ជាទេពនិករ (សត្វសេះ)។ ទើបនាំអស់ទេវបុត្រទេវធីតាទាំងមួយសែនកោដិហោះទៅ កាន់គុហាកែវ គន្ធមាលី នាទីភ្នំកៃលាស ខេត្តហិមពាន្ត ជាទីតំកល់ទុកនូវព្រះសិរសា កបិលមហាព្រហ្ម ដែលតំកល់លើពានមាសនាំមកដង្ហែប្រទក្សិណ ភ្នំព្រះសុមេរុរាជ តាមផ្លូវព្រះអាទិត្យចរចំនួន៦០នាទី។ទើបនាំយកទៅតម្កល់ទុកកន្លែងដើមវិញហើយ ប្រជុំទេវបុត្រទេវធីតាទាំងមួយសែនកោដិចូលទៅស្រង់ទឹកអនោតត្តមហាស្រះ ដែល មានទឹកហូរចេញពីបំពង់ថ្មកែវ ដែលជាមាត់គោឧសភរាជទាំង៧ ត្រជាក់ក្សេមក្សាន្ត ព្រះរាជហឫទ័យ ហើយនាំគ្នាចូលទៅសមាទានរក្សាសីលដោយសោមនស្សរីករាយ គ្រប់ ។ ព្រះអង្គក្នុងភគវតីសភា សាលាដែលព្រះវិស្សកម្មទេវបុត្រនិមិត្តថ្វាយ ដើម្បី បន្ទោបង់អពមង្គលឱ្យជ្រះស្រឡះ ហើយចម្រើននូវសិរីសួស្តីជ័យមង្គលជន្មាយុយឺនយូរ ដល់ទេវតានិងមនុស្សសត្វផងទាំងឡាយ តាំងពីឆ្នាំថ្មីចូលមកនេះបានទូលំទូលាយ សុខក្សេមក្សាន្តតរៀងទៅ។ ថ្ងៃអង្គារ ១២រោច ខែចេត្រ ត្រូវនឹងថ្ងៃទី១៤ ខែមេសា ឆ្នាំ ២០២៦ ពីវេលាម៉ោង ១០និង៤៨នាទីព្រឹក ជាថ្ងៃវិរ:មហាសង្ក្រាន្ត ថ្ងៃពុធ ១៣រោច ខែចេត្រ ត្រូវនឹងថ្ងៃទី១៥ ខែមេសា ឆ្នាំ ២០២៦ ជាថ្ងៃវារៈវ័នបត ថ្ងៃព្រហស្បតិ៍ ១៤រោច ខែចេត្រ ត្រូវនឹងថ្ងៃទី ១៦ ខែមេសា ឆ្នាំ ២០២៦ ជាថ្ងៃវារៈឡើងស័ក គម្រប់ជាមហាសង្ក្រាន្ត ៣ថ្ងៃ ស្រេចបរិបូណ៌ចូលជាសកល ឆ្នាំមមី អដ្ឋស័ក ចុល្លសករាជ ១៣៨៨ មហាសករាជ១៩៤៨ ពុទ្ធសករាជ ២៥៧០ តរៀងទៅ។ នៅក្នុងឱកាសសង្ក្រាន្តទាំងបីថ្ងៃ សូមអស់ប្រជាពលរដ្ឋប្រុសស្រីផងទាំងឡាយរៀបចំពលិការ គ្រឿងសក្ការបូជា អុចប្រទីបជ្វាលាថ្វាយ ព្រះរតនត្រ័យ និងទទួលស្វាគមន៍ ទេវបុត្រ ទេវធីតា ឆ្នាំថ្មី ហើយខំលះបង់ចិត្តអាក្រក់អន្យតិរ្ថីយជាចិត្តអប្រិយជាប់ដោយគំនុំគុំគួនព្យាបាទឈ្នានីសដែលកើតមានក្នុង ឆ្នាំចាស់ ឱ្យជ្រះស្រឡះតាំងចិត្តប្រព្រឹត្តល្អប្រកបដោយ មេត្តា ករុណា មុទិតា ឧបេក្ខា និង បញ្ញា ធ្វើបុណ្យសុន្ទរ៍ទានតាមប្រពៃណី រក្សាសីលប្រាំឱ្យបានជាប់ជានិច្ចនោះ ទេវតា នឹងឱ្យពរសព្ទសាធុការ លោកអ្នកនឹងមានសិរីសួស្ដី សុភមង្គល វិបុលសុខគ្រប់ប្រការតាំងពីឆ្នាំថ្មីនេះតរៀងទៅ។៙៚ #រាក្យសាទេវីបុត្រីទី៣ #សង្ក្រាន្តឆ្នាំមមីអដ្ឋស័ក #មហាសង្ក្រាន្តម៉ោង១០និង៤៨នាទីព្រឹក - @p.snation