@adyrnakz: Баян Мақсатқызы: «Дінді агрессивті насихаттауға қарсымын» Танымал продюсер Баян Мақсатқызы Наурыз мерекесін тойламауға шақырған ер адамның сөзіне қатысты пікір білдіріп, қоғамдағы діни радикализм мәселесіне алаңдаушылық танытты. Оның айтуынша, Қазақстан — зайырлы мемлекет, сондықтан әр азамат өз дінін ұстануға ерікті, алайда оны өзгелерге күштеп таңуға болмайды. «Мен дінге қарсы емеспін. Әркім өз таңдауы бойынша құлшылық жасасын. Бірақ оны агрессивті түрде насихаттап, біздің дәстүрлерімізге тыйым салуға тырысу — дұрыс емес. Біз зайырлы қоғамбыз», — деді Баян Мақсатқызы. Сондай-ақ ол мұндай көзқарастардың көбейіп бара жатқанын айтып, бұл жағдайды ұлттық қауіпсіздік мәселесі ретінде бағалады. «Бұл — ұлттық қауіпсіздікке қатысты мәселе. Біз үндемей отыра алмаймыз. Ертең кеш болуы мүмкін», — деп атап өтті ол.