Белгілі продюсер Баян Алагөзова өзінің әлеуметтік желісінде елдегі теріс діни ағымында жүрген адамдардың көптігін және олардың соңғы уақыттағы агрессивті қылықтарын айтып, елдің болашағы, балаларының келешегі үшін алаңдайтынын жеткізді. Продюсер мемлекет деңгейінде діни пропагандаға тыйым салатын заң қабылдауды ұсынады. «Бұл ұлт қауіпсіздігі мәселесі. Ваххабистер таңертеңнен кешке дейін әлеуметтік желіде отырып, бізді өз тілімізден, дәстүрімізден, тіпті мерекемізден де айырғысы келеді. Олар көп және өте агрессивті болып барады. Біз зайырлы мемлекетпіз және діни пропагандаға тыйым салатын заң қабылдайтын уақыт әлдеқашан туды. Мен дінге қарсы емеспін, бұл әркімнің жеке таңдауы. Мен де Құдайға сенетін адаммын. Бірақ, мұны мұндай агрессиямен жеткізіп, өз ережесін таңудың қажеті жоқ. Әркім үнсіз сеніп, үнсіз құлшылық жасауы қажет. Әйтпесе, сақалды еркектер мен үсті-басын орап алған әйелдер таңертеңнен кешке дейін бізге қалай өмір сүріп, не арам, не адал екенін айтып, бізді тұсау кесер секілді өз дәстүрімізден айнытып жатқаны шынымен өте қорқынышты. Үндемей қалуға енді болмайды. Мен өз елімнің болашағы үшін алаңдаймын. Қаңтар оқиғасында осы сақалдылар біздің қаламызды қиратқанын ұмытпаған боларсыздар?! Бұл түптеп келгенде ұлт қауіпсіздігі мәселесі. Сондықтан, әріптестерімді, зиялы қауымды үн қосуға шақырамын. Өкінішке қарай, отандық әртістердің көбі осы ағымда жүр, олардың көзі ашылып, жақын арада адасып жүргендерін түсінеді деп сенемін», деді продюсер. Жақында 1991 жылғы азамат TikTok желісінде видео жүктеп, Наурызды «мұсылмандар мерекесі емес» деп атап, оны тойлауға тыйым салуға шақырған. Видео қоғамда үлкен наразылық тудырды. Желі қолданушылары блогерді ұлттық құндылықтарға нұқсан келтіріп, ел ішіне іріткі салды деп айыптады. Артынша оны полиция қамауға алғанын хабарлаған. - @juzmedia