Waad i ilawday… sida qof aan waligiis jirin, sida sheeko aan dhammaad lahayn oo si fudud loo xiray. Aniguse ma aanan ku jeclaan si sahlan, mana aanan kuu arkin qof mar uun la illoobi karo. Xataa anigoo aan si buuxda kuu fahmin, ayaan ku doortay—qalbi aan wali dhaawac arag, dareen aan wali baran sida loo ilaaliyo. Waxaan ku jeclaaday si ka duwan sidii aan qof kale u jeclaan lahaa. Ma ahayn jacayl aan ku ciyaaro ama aan ku tijaabiyo wuxuu ahaa mid igu cusub, mid iga dhab ah. Adigaa noqotay qofkii ugu horreeyay ee qalbigaygu si daacad ah u aqbalo. Waxaan kuu furay meel aan cid kale hore u gaarin, meel jilicsan oo aanan garanayn sida loo xiro haddii la jebiyo. Laakiin waxaad igu reebtay dhaawac… anigoo wali ah qof qalbigiisu curdin yahay, aanan weli baran sida loo adkaysto xanuunka noocaas ah. Waxaad iga qaaday kalsooni, waxaad iga qaaday deganaansho, waxaadna iga tagtay su’aalo aan jawaab lahayn. Maxaan sameeyay? Maxaan ku qaldamay? Mise jacaylkayga ayaa kaa badnaa? Mararka qaar waxaan is iraahdaa, malaha adigu si dhab ah iima aadan arkin. Malaha waxaad i aragtay sidii qof mar uun la dhaafi karo laakiin anigu sidaas kuma aanan arkin. Anigu waxaan kuu arkayay qof aanan rabin inaan waayo, qof aan mustaqbal la rabo. Waxaan xasuustaa sida aan kuu jeclaa si daacad ah, si aan xuduud lahayn. Waxaan ku siinayay dareen aanan xisaabin, anigoo aan ka baqayn waxa ka iman kara. Laakiin maanta, waxa aan la joogo waa xusuus iyo qalbi si tartiib ah u baranaya sida uu u adkaan lahaa. Haa, waxaad ahayd jacaylkii iigu horreeyay… jacayl aanan waligay illoobi doonin. Laakiin sidoo kale waxaad noqotay casharkii iigu horreeyay mid i baray in qof walba oo aad jeclaato uusan ahayn qof kuu qalma. Weli waan xanuunsanahay, welina waan xasuustaa. Laakiin gudaha qalbigayga waxa ka bilaabanaya faham cusub inaan naftayda ka mudanahay in la ilaaliyo, in aanan mar kale si sahlan qalbigayga u siin qof aan ogayn qiimihiisa. Waad i ilawday, taas waan aqbalay. Laakiin anigu ma ilaawi doono waxa aan kaa bartay… iyo sida aan u baranayo inaan naftayda ka dhiso meel ka xoog badan halkii aad iga jebisay.#foryoubage11part1 #qalinkiimucaashaq #qalbijabmucashaq12 - @jacylooow