ڕەگی پیسی: شکستی پەروەردە. با ڕاشکاو بین، ئەوەی دەم دەکاتەوە بە جنێو، یان لەناو ماڵەکەی گوێی لەو پیسییە بووە و لاسایی کردۆتەوە، یان ئەوەتا دایک و باوکی بێدەنگ بوون لە ئاست گەورەبوونی ئەو زمانە پیسەی. لە هەردوو حاڵەت، ئەنجامەکە هەر یەکە. ئەگەر دایک و باوکێک ببیستن منداڵەکەیان کەرامەتی خەڵک دەشکێنێت و بێدەنگ بن، ئەوا لەو چرکەساتەدا ئەوانیش لەگەڵیدا جنێو دەدەن. چونکە بێدەنگی لە ئاست بێڕەوشتی، واتە ڕەزامەندی. ماڵێک کەرامەتی تێدا بێت، ڕێگە نادات منداڵەکەی ببێتە زبڵدانێکی گەڕۆک لەناو شەقام و سۆشیاڵ میدیادا. پەروەردە تەنها قسەی جوان نییە، بەڵکو سزا و سنوورە. ئەگەر ڕێگەت دا منداڵەکەت بە زمانی پیس هێرش بکاتە سەر خەڵک و توڕە نەبوویت، ئەوا پیرۆزت بێت؛ تۆ جنێودەرێکی بێدەنگیت و بەرپرسیاری یەکەمی لەو ڤایرۆسە ئەخلاقییەی کە بەردراوەتە گیانی کۆمەڵگە جنێو وەک چەکی لاوازەکان جنێودان، شکستی عەقڵە. کاتێک زمانت دەبێتە زبڵدان، مانای وایە لە ناوەوە هیچی ترت شک نەبردووە بۆ سەلماندنی بوونی خۆت. بەڵام ئەوەی لای من قێزەونترە، ئەو جۆرە بەرگریکارەیە کە دەیەوێت بە جنێو وەڵامی جنێو بداتەوە. ئەگەر یەکێک بێڕەوشتیی بەرامبەر کردیت و تۆش بە هەمان زمانی ئەو وەڵامت دایەوە، ئەوا پیرۆزت بێت؛ تۆ هیچ نیت جگە لە کۆپییەکی نوێی ئەو. لای من و لای هەر عەقڵێکی ساخ، هیچ فەرقێک نییە لە نێوان ئەو سەگەی کە دەوەڕێت و ئەو سەگەی کە لەبەرانبەریدا دەوەڕێتەوە؛ دواجار هەردووکتان سەگن. لەمەودوا کە بێڕەوشتێکت بینی، مەبە بە ئاوێنەیەک بۆ نیشاندانەوەی پیسییەکانی ئەو. چونکە پێکدادانی دوو بێڕەوشت، نیشانەی ئازایەتی نییە، بەڵکو مەزادخانەیەکە بۆ فرۆشتنی کەرامەت. لای من، ئەو کەسەی وەڵامی جنێو دەداتەوە ڕسواترە لەوەی کە دەستی پێکردووە، چونکە یەکەمیان تەنها نزم بوو، بەڵام دووەمیان هەموو شکۆیەکی خۆی کوشت تەنها بۆ ئەوەی بیسەلمێنێت کە دەتوانێت هێندەی ئەو نزم بێت. یان وەک ئینسان وەڵامی بدەرەوە، یان وەک تەرم لێی بێدەنگ بە؛ چونکە مێژوو ناوی هەردووکتان لە یەک لاپەڕەی پڕ لە پاشەڕۆدا دەنووسێتەوە. دێنڤێر .. ئیبراهیم بێ شێخ #foryou #fyp #tiktok - @den.v3r