බුදුන් වහන්සේ යනු හුදෙක් පුරාවෘත්තයක් හෝ සංකල්පයක් නොව, සැබවින්ම මෙලොව ජීවත් වූ මහා ශාස්තෘවරයෙකු බව තහවුරු කිරීමට ලැබී ඇති අතිශය දුර්ලභ වගේම ප්‍රබලම පුරාවිද්‍යාත්මක සාක්ෂියක් පිළිබඳවයි මේ සටහන. 🔴සොයාගැනීම (1962-1963) ඉන්දියාවේ ගුජරාට් ප්‍රාන්තයේ දෙව්නි මෝරි (Devni Mori) නම් ප්‍රදේශයේ සිදුකළ පුරාවිද්‍යා කැණීම් වලදී ක්‍රි.ව. 3-4 සියවස් වලට අයත් විශාල ස්තූපයක නටබුන් හමු විය. මෙම ස්තූපය තුළ ඉතා සුරක්ෂිතව තැන්පත් කර තිබූ මෙම සුවිශේෂී ගල් කරඬුව හමු වූයේ 1963 ජනවාරි 14 වන දිනයි. 📜 "දශබල ශරීර නිලයාහ" සෙල්ලිපිය මෙම කරඬුව ලොව පුරා ප්‍රසිද්ධ වීමට ප්‍රධානතම හේතුව එහි කොටා ඇති අගනා සෙල්ලිපියයි. මෘදු පාෂාණයෙන් (Schist) නිමවා ඇති මෙම කරඬුව මත බ්‍රාහ්මී අක්ෂරයෙන් මෙසේ සඳහන් වේ: "දශබල ශරීර නිලයාහ" (Dashabala Sharira Nilayaha) මෙහි සරල අර්ථය වන්නේ "දශබලයන් වහන්සේගේ (බුදුන් වහන්සේගේ) ශාරීරික ධාතූන් වහන්සේලා නිදන් කර ඇති ස්ථානය" යන්නයි. බුදුන් වහන්සේ වෙනුවෙන් භාවිතා කරන "දශබල" යන ගෞරව නාමය සෘජුවම මෙහි සඳහන් කර තිබීම මෙහි ඇති සුවිශේෂත්වයයි. ✨ කරඬුව තුළ තිබූ දෑ මෙම මහා කරඬුව තුළ රන් කරඬුවක් තිබූ අතර, ඒ තුළ ඉතා සිහින් රෙදි කැබැල්ලක ඔතා තිබූ ශාරීරික ධාතූන් වහන්සේලා තැන්පත් කර තිබුණි. මීට අමතරව එම යුගයට අයත් කාසි සහ වෙනත් පූජා භාණ්ඩ ද එහි විය. 🏛️ වර්තමාන තත්වය මෙම අති පූජනීය කරඬුව සහ ධාතූන් වහන්සේලා දැනට ඉන්දියාවේ වඩෝදරා හි මහාරාජා සයාජිරාඕ විශ්වවිද්‍යාලයේ (MSU) පුරාවිද්‍යා කෞතුකාගාරයේ ඉතා සුරක්ෂිතව මහජන ප්‍රදර්ශනය සඳහා තබා ඇත. ඉතිහාසය සහ යථාර්ථය ගවේෂණය කරන අපට, බුදු දහමේ සත්‍යතාවය ලොවටම කියාපාන මෙවැනි සාක්ෂි අභිමානයකි.☸️🙏🙏🙏 gihan sampath page 1 - @gihan.sampath.page1