Шэньчжэньдегі BYD зауытында ірі өрт шықты Қытайдың Шэньчжэнь қаласында орналасқан әлемдегі ірі электрлі көлік өндіруші BYD компаниясының Пиншань ауданындағы кампусында жойқын өрт болды. Көп қабатты автотұрақтан басталған тілсіз жау қысқа уақыт ішінде ғимараттың жоғарғы қабаттарын шарпып, көкке қою қара түтін көтерілді. Оқиға орнына ондаған өрт сөндіру бригадасы мен арнайы техника жедел жетіп, жалынды ауыздықтауға кірісті. Ресми мәліметтерге сәйкес, оқиға салдарынан қаза тапқандар мен зардап шеккендер жоқ. Алайда тұрақта тұрған бірнеше сынақ көлігі мен есептен шығарылған ескі техникалар толығымен жанып кеткен. Компания өкілдері өрттің негізгі өндірістік желілерге зақым келтірмегенін және жаңа дайын көліктерге әсер етпегенін мәлімдеді. Алдын ала тергеу қорытындысы бойынша, өрт батареялардың ақауынан емес, сыртқы мердігерлердің жұмыс кезіндегі қателігінен шыққан. Жабдықтарды бөлшектеу барысында қауіпсіздік ережелері сақталмай, оқшаулағыш материалдар тұтанған көрінеді. Осы оқиғадан кейін компанияның акциялары Гонконг биржасында шамамен 1%-ға төмендеді. Қазіргі уақытта арнайы комиссия материалдық шығын көлемін есептеп, оқиғаның нақты жағдайларын жан-жақты тексеріп жатыр. - @qrnewskz