Қарағанды облыстық жұқпалы аурулар ауруханасында Кәусар Серік есімді 1 жас 3 айлық қыз бала қайтыс болды. Бала ішек инфекциясымен ауруханаға түскен, кейін жағдайы нашарлаған соң жансақтау бөліміне ауыстырылып, өкпені жасанды желдету аппаратына (ИВЛ) қосылған. Үш жарым апта бойы жүргізілген ем-шараларға қарамастан, сәбиді аман алып қалу мүмкін болмады. Бұған дейін әлеуметтік желілерде анасы Астанадан ЭКМО аппаратын жеткізуді сұрағаны туралы ақпарат тараған болатын. ЭКМО — аса ауыр жағдайларда ағзаның қызметін қолдауға арналған медициналық жүйе. Бұл жағдай қоғамда кең талқылауға себеп болды. Осыған байланысты аурухана әкімшілігі ресми түсініктеме берді. Медициналық мекеменің мәліметінше, балада бактериалдық, вирустық және саңырауқұлақтық қоздырғыштардан тұратын ауыр аралас инфекция анықталған. Сондай-ақ, айқын иммун тапшылығы бар екені және туғаннан бері екпе алмағаны хабарланды. Ауруханада емдеу Қазақстан Республикасының клиникалық хаттамаларына сәйкес толық көлемде жүргізілгені, ем тактикасы бірнеше рет республикалық деңгейдегі консилиумдарда тиісті мамандардың қатысуымен қаралғаны айтылды. 🎥 @patriotkaragandy - @adyrnakz