لما الدنيا تضيق عليك، أكون المساحة البتوسع، ولما تتلخبط، أكون الشي البرتبك، ولما تبعد، أكون الحنين البرجعك. أحاول أعدي ليك حتاتك الصعبة، الحاجات البتضايقني وما بقولها، وأتعلم أقرأ سكوتك قبل كلامك، وأفهمك حتى في اللحظات الإنت ذاتك ما فاهم نفسك فيها. ح أحاول أكون أهدى، ما أستعجل الزعل، ولا أكبر المواضيع الصغيرة، وأديك مساحة تكون إنت… بدون ما أفرض عليك تكون كيف. ح أحاول أستحملك في يومك التقيل، وأفرح بيك في يومك الخفيف، وأكون معاك في النص… لا سابقك لا متأخر عنك. يمكن مرات أتعب، يمكن مرات أحس إني بدي أكتر مما باخد، لكن برجع وأقول: يمكن دي مرحلة… وبتعدي. ح أحاول ما أكون قاسي في الحكم عليك، ولا أفتش فيك الغلط قبل الصح، وأفتكر إنو كل زول فينا عندو وجع مخبيهو، وبحارب بطريقتو. بس برضو… ح أحاول ما أضيع نفسي فيك، ما أتنازل عني لدرجة أنسى أنا منو، لأنو العلاقة البتقوم على طرف واحد… بتتعب، وما بتكمل. ح أحاول أقرب ليك، وأفتح ليك قلبي بدون خوف، وأقول ليك الحاصل جواي بدون لف ودوران، عشان ما نخلي الفهم الغلط يكبر بينا. لكن بيني وبينك… المحاولة دي ما مفروض تكون شغل زول واحد، ما معقولة أنا أمد إيدي كل مرة، وإنت واقف تتفرج أو تتردد. لو دايرني أحاول علشانك… حاول معاي، أمشِ خطوة وأنا أمشي خطوة، خلينا نلقى بعض في النص، ما أنا أجيك كلو… وإنت لسه في مكانك. ح أحاول… لأنك بتهمني، ولأنو في حاجة حلوة ممكن تقوم بينا لو إديناها حقها. لكن المرة دي، ما داير أحاول براي… داير أحس إنك معاي، إنك شايل نفس الرغبة، ونفس التعب… ونفس الأمل. ح أحاول علشانك… لكن كمان، علشاننا. مقــ⁷ـداد #خواطر #سودانيز_تيك_توك_مشاهير_السودان🇸🇩 #سودانيز_تيك_توك_مشاهير_السودان #جخو،الشغل،دا،يا،عالم،➕_❤_📝 - @megdadahmed22