@yeiknyain: ဆယ်ငါးနှစ်လောက် ငွေနောက်အသဲအသန် လိုက်ခဲ့တယ် ။ ငါ့မှာလိုချင်တာတွေကို လုံလုံလောက်လောက် ဖြည့်နိုင်ပြီလို့ ထင်ရတဲ့အချိန် ဘာလိုချင်မှန်းမသိတော့ဘူး.. တဲ့ ။ အရမ်းခင်ရတဲ့ အကိုသူငယ်ချင်းတစ်ယောက် ပြောတဲ့ စကားလေးပါ ။ သူက အသက်နှစ်ဆယ်လောက်ကတည်းက နိုင်ငံခြားထွက်ပြီးစီးပွားရှာခဲ့တာ မိသားစုရော ချစ်သူခင်သူတွေရောကို အကုန်စွန့်ပြီးပေါ့ ။ ခုဆို အသက်အားဖြင့် 40 နားကပ်နေပြီ လူ့ဘဝသက်တမ်းတစ်ဝက်မကတော့ဘူးပေါ့ဗျာ ။ ငွေကြေးအရ လိုချင်တာကိုစဥ်းစားစရာမလိုပဲ ဝယ်နိုင်တဲ့အနေထားလည်းရောက်ရော သူဘာလိုချင်မှန်းမသိတော့ဘူး တဲ့ ။ တကယ်က သူ ပိုက်ဆံရှိရင် ဘာမဆိုရမယ်လို့ထင်ထား ခဲ့တာ ။ ပျော်ရွှင်မှုတွေ လွတ်လပ်မှု ငယ်ရွယ်မှု နွေးထွေးမှု မေတ္တာတရားနဲ့ စိတ်ခံစားမှုတွေ ပေါ့ ။ ငွေနောက်လိုက်တဲ့လမ်းမှာ ငွေနဲ့ပေးဝယ်မရတာတွေကို ကျောခိုင်းထားမိခဲ့တာ ။ "ကာလတစ်ခုမှာ အဲ့ကာလနဲ့လိုက်လျောညီထွေတဲ့ ဘဝတစ်ခုကို ရယူသင့်တယ် ။ မဟုတ်ပဲ ဦးတည်မှုတစ်ခုနောက်အငမ်းမရလိုက်ရင် လူဖြစ်ရှုံးတာပဲ"..တဲ့ ။ ဟုတ်တယ်ဗျ ။ ကျနော်တို့ အသက်အရွယ်အလိုက် ဆိုးမိုက်မှုတွေ ရူးသွပ်မှုတွေ အမှန်တွေအမှားတွေဟာ တကယ်တော့ အမှတ်တရတွေပါပဲ ။ ဘာနဲ့မှ လဲယူလို့မရ ငွေနဲ့လည်းဝယ်လို့မရတဲ့အထဲမှာ အသက်အပိုင်းအခြားတစ်ခုရဲ့ ပကတိအတိုင်း ကျော်ဖြတ်ခြင်းတွေပါတယ် ။ စိတ်ခံစားမှုအတိုင်း ပျော်ဝင်ပစ်ခြင်းတွေပါတယ်။ လုပ်မိလို့ရတဲ့ နောင်တထက် မလုပ်မိလို့ရတဲ့ နောင်တတွေက ပိုဆိုးတယ် ။ "ငါသာပြန်ငယ်လို့ရရင် ငွေကိုအသဲအသန်ရှာမိတဲ့ အချိန်တွေအထဲကနေ သုံးပုံးနှစ်ပုံကို မိသားစု ငါ့သူငယ်ချင်းတွေ ငါချစ်ရတဲ့သူတွေအတွက်ပေးပစ်ချင်တယ်".. တဲ့ ။ မရတော့တဲ့အရာတွေ သူဝယ်လို့မရတဲ့ အရာတွေပါပဲ ။ သူ့ မိသားစုတွေလည်းလူမစုံတော့ဘူး သူ့သူငယ်ချင်းတွေလည်းလူမစုံတော့ဘူး နောက်ဆုံး သူကိုယ်တိုင်လည်း ပြန်ရောက်အောင်သွားလို့မရတော့ဘူး ။ ဘယ်နည်းနဲ့မှ ရှာဖွေလို့ပေးဆပ်လို့မရတော့ဘူး ။ လောကမှာ ငွေက အရာရာပဲ ဆိုတာ မှန်သင့်သလောက်မှန်ပါတယ် ။ ဒါပေမယ့် ငွေရှိတိုင်းမရတာတွေလည်း အများကြီးရှိတယ် ။ လိုပါတယ် ကျနော်တို့ရှာဖွေရလိမ့်မယ် ။ ရှာဖွေရင်း မပျောက်ဆုံးအောင်ဂရုစိုက်ရမယ့်အရာတွေ လက်လွှတ်မခံရမယ့်အရာတွေလည်း ရှိတယ်ဆိုတာမမေ့ပါနဲ့ ..။ #ရိပ်ငြိမ်

Yeik Nyain -ရိပ်ငြိမ်-

Open In TikTok:

Region: MM

Tuesday 21 April 2026 09:42:07 GMT