@karakiya_ms: Ақтаулық отбасы экологиялық өмір салтын трендке айналдырды Ақтаулық отбасы экологиялық өмір салтын трендке айналдырып жүр. «Таза Қазақстан» акциясы аясында «Эко отбасы» номинациясын иеленген Гүлайым Қибастың жанұясы бірнеше жылдан бері саналы тұтыну мен табиғатты қорғау мәдениетін қоғамға белсенді түрде насихаттап келеді, деп хабарлайды Қоғамдық коммуникация орталығы. Алты жылдан бері Гүлайым Қибас жеке Instagram парақшасында экологиялық мәдениетті қалыптастыруға бағытталған блог жүргізеді. Бұл бастамаға жолдасы мен отбасы толық қолдау білдірген. Бүгінде олар тек өз өмірлерінде ғана емес, қоғамда да экоәдеттерді кеңінен таратуға үлес қосып жүр. Ол бір реттік ыдыстар мен жиі қолданылмайтын киімдердің табиғатқа зияны бар екенін айтты. –Қазіргі заманда адамдар қажетсіз заттарды шамадан тыс сатып алады. Киім, жиһаз, тұрмыстық бұйымдар көп жағдайда қолданылмай, қоқысқа кетеді. Бұл табиғи ресурстардың азаюына әкеледі. Сондықтан саналы тұтыну мәдениетін қалыптастыру өте маңызды. Қоқыс полигондарына тасталған қалдықтар ұзақ уақыт бойы шіріп, топырақ пен ауаны ластайды. Бұл өз кезегінде жер асты сулары арқылы теңізге жетіп, адам денсаулығына кері әсерін тигізуі мүмкін, – дейді Гүлайым Қибас. Гүлайымның айтуынша, әрбір адам қоқысты сұрыптап, қайта өңдеуге жіберуді әдетке айналдыруы тиіс. Себебі қоқыс жойылып кетпейді, ол ұзақ уақыт бойы қоршаған ортада сақталып, табиғатқа зиянын тигізеді. Отбасы тек сөзбен емес, іспен де үлгі көрсетуде. Олар Ақтау қаласындағы 7-шағынауданда өз қолдарымен шағын бақ отырғызып, оны күтіп-баптап келеді. Екі жылдан бері сирень, раушан және әр түрлі ағаштарды өсіріп, жасыл желекті көбейтуге үлес қосуда. –Бала кезімізде 26-шағынауданда аймақ жасыл желекке толы болатын. Қазір ағаштар азайып кетті. Сондықтан жолдасымның қолдауымен өз үлесімізді қосқымыз келді, – дейді Гүлайым Қибас. Гүлайымның отбасы бір реттік ыдыстарды пайдаланбайды және барған жерінде экологиялық өмір салтын насихаттайды. Балалары да бұл қағидаларды ұстанып, айналасына үлгі көрсетіп жүр. Айта кетейік, «Таза Қазақстан» акциясы қоршаған ортаны қорғау мен экологиялық мәдениетті арттыруға бағытталған маңызды бастамалардың бірі.

There are no more comments for this video.

To see more videos from user @karakiya_ms, please go to the Tikwm homepage.