@adyrnakz: Астананың Жасыл белдеуінде «Halyk Орманы» экологиялық бастамасы аясында миллионыншы көшет егілді. Айтулы оқиға 2026 жылғы 25 сәуірде Жалпыұлттық ағаш егу күні аясында өтті. Жоба 2025 жылдың күзінде 1 млрд теңге бюджетпен басталды. Бүгінде үш өңірдегі 240 гектар аумақта 1 миллионнан астам ағаш егілді. 2026 жылы жобаға жаңа серіктестер қосылды. Олардың қатарында FlyArystan әуе компаниясы мен EUROBAK Еуропалық бизнес-қауымдастығы бар. Осы әріптестік аясында қосымша 55 гектар жерге 190 мың көшет отырғызу жоспарланып отыр. «Жобаның басты мақсаты - бес жыл ішінде 9 миллион көшет пен шыбық егу. Миллионыншы көшет биылғы алғашқы маңызды белес. Біз осы бағыттағы жүйелі жұмысымызды жалғастыра береміз. Әсіресе, Экология министрлігімен бірге қолға алған бастамамызға халықаралық және отандық ұйымдардың қолдау білдіріп жатқаны көңіл қуантады», - деді Halyk қайырымдылық қорының бас директоры Сағынбек Шүнкеев.
