ح يمر عليك وقت تلاقي نفسك اتعلمت الكتمان… في حين إنك كنت أكتر زول يعرف يفضفض ويتكلم، كنت بتحكي من غير حساب، وتضحك من قلبك، وتفتكر إنو كل الناس زيك… واضحة وبسيطة. لكن الحياة ما بتمشي زي ما بنفكر، في حاجات بتمر عليك بتخليك تبقى إنسان هادي… كتوم… وتختار إنك تكون براك، مش لأنك حبيت العزلة، لكن لأنك جربت القرب الغلط. اكتشفت إنو انت بتسكت ما عشان ما عاوز تحكي، أو ما لاقي زول تحكي ليه مشاكلتك… بتسكت لأنه في لحظة معينة فهمت إنو ما في زول حيحس بنفس الوجع الجواك، وإنو في تفاصيل لو انقالت بتتفهم غلط، وفي مشاعر لو انشرحت بتتقلل. في كلام ما بيتقال… وفي إحساس لو حاولت تشرحو، بتضيع معاه المعاني، وفي وجع كدا عميق، ما عندو لغة، بس ساكن جواك وعايش معاك كل يوم. ما كل زول ينفع إنك تفتح ليه قلبك، وما كل زول عندو القدرة يشيل كلامك من غير ما يكسروه، في ناس بتسمع عشان ترد، وفي ناس بتسمع عشان تفهم… وفرق كبير بينهم. عشان كدا بقيت تختار الصمت، تختار السلام على إنك تدخل نقاشات بتستنزفك، تختار تحافظ على نفسك بدل ما تشرحها لكل زول مار. لكن الغريب… إنك وسط الزحمة دي كلها، ممكن تقابل زول واحد بس، ما كنت متوقعه، زول بسيط… لكن حضوره مختلف، كلامه خفيف… لكن أثره عميق. الزول دا، بدون ما تحس، بيرتبك، بيرجعك لنسختك القديمة… النسخة البتضحك بسهولة، النسخة البتحكي من غير خوف، النسخة البتثق من غير حساب. تحس معاه إنك ما محتاج تمثل، ما محتاج تشرح كتير، نظرة واحدة منو تكفي، وسكوتك قدامه ما بيكون تقيل… بيكون مفهوم. نحن بنرجع لروحنا الحقيقية لما نلقى قلب يحتوينا، كتف يسندنا وقت التعب، يد تتمسك بينا من غير ما تسألنا ليه تعبنا. ولما تلقى الزول دا… بتفهم إنك ما كنت غلطان لما لجأت ليه، وإنو كل السكوت الفات كان بس عشان توصل للمكان الصح، وللشخص الصح. لكن برضو، في الحقيقة القاسية… إنك ح تمر بلحظات كتيرة تختار فيها السكوت، في وقت أنت مليان بالكلام، مليان حكايات، مليان وجع، مليان أسئلة. تضحك قدام الناس، وترد بـ “أنا كويس”… وأنت جواك ألف حاجة عاوز تقولها، لكن عارف إنو ما كل زول يستاهل يسمعها. وفي النهاية… بتتعلم إنو الكتمان ما ضعف، وإنو الصمت مرات بيكون قوة، وإنك لما تختار تسكت، ما معناتو إنك ما لاقي كلام… لكن لأنك عرفت قيمة كلامك… وعرفت منو البيستاهل يسمعو 💖💔 - @ayuobalmarde