@mohamdd577: الأمل ما داك الشعور البتسمعوا في الأغاني ولا الكلام الحلو البتقال في البدايات. الأمل الحقيقي بطلع من تحت حطامك … من بعد ما كل حاجة تقع، من بعد ما الزول يقول: “خلاص ما في داعي أكمل”. وبرضو يكمل. في لحظات كدا، بتكون واقف بين حاجتين: إنك تستسلم ساي وتمشي، أو تقعد في مكانك وتحاول حتى لو ما شايف قدامك أي نور. والاختيار التاني دا، هو الأمل… لكن ما الأمل الساهل، الأمل البوجع بالجد عشان تكون احسن الأمل مرات بكون بسيط شديد، ما في شكلو أي عظمة. زي إنك تقوم من السرير رغم إنك ما داير تقوم. زي إنك ترد على الدنيا وانت جواك مكسر لأف حته. زي إنك تضحك ضحكة خفيفة عشان الناس ما تسألك “مالك؟”. وفي ناس بتفتكر الأمل في الناس التانيه … في زول يرجع، أو موقف يتصلح، أو كلام يتقال في وقته. لكن الحقيقة إنو الأمل لو كان مربوط بيد زول، بيموت مع أول موقف يخزلك فيه . عشان كدا الأمل الببقي بالجد ، هو البتخليه جوة نفسك إنت، ما برا. الأمل ما بيمسح الحصل ليك ، لكن بيديهو فرصة يخف. ما بصلّح الماضي، لكن بخليك تصدق إنو الجاي ما لازم يكون نفس الحصل وبعلمك عشان م تقع في نفس اخطاءك. ودي في حد ذاتها شجاعة. أصعب حاجة في الأمل، إنو مرات ما في دليل إنو بكرة أحسن. ما في ضمانات، ما في وعود. متوكل وكلك امل في ربنا : “ان شاء الله كل الجاي خير ”. والحقيقة البسيطة… إنو الزول البفقد الأمل، ما بيقيف في مكانو ساي، بيبدأ يختفي من جوه بفقد شخصيتو وتعاملو مع الغير والحياه كلها . عشان كدا التمسك بيهو ما رفاهية، دا شكل من أشكال النجاة. وفي النهاية، الأمل ما قصة نجاح كبيرة ولا نهاية سعيدة مضمونة. الأمل هو إنك، رغم كل التعب، لسه قادر تقول:ان شاء الله بكره احسن 😊 Mohamed 💔
