الاختيار حاجة تقيلة شديد، ما بتتوزن بالكلام الساهل ولا بتتحسم بي لحظة حماس ولا مزاج عابر. الاختيار دا زي طريق واقف قدامك إما تمشي فيهو وانت عارف نهايتو شنو أو تمشي وانت ما عارف الحاصل شنو قدامك... لكن قلبك قال ليك امشي. نحنا من يوم وعينا على الدنيا بنختار ... يمكن بدون ما نحس نختار أصحابنا، نختار نسامح ولا نكبر الموضوع نختار نتمسك بناس، رغم إنهم مرات ما متمسكين بينا بنفس القدر ونختار نسیب ناس رغم إنهم كانوا جزء من روحنا يوم من الأيام. والمشكلة ما في الاختيار ذاتو.... المشكلة في النتيجة البتجي بعدو لأنو أي اختيار، حتى لو كان صح، لازم فيهو خسارة في حتة تانية. تختار تمشي ؟ بتخسر البتخليتو وراك. تختار تقعد ؟ يمكن تخسر نفسك وانت واقف في نفس المكان. تختار تحب؟ بتدخل نفسك في مخاطرة، يا فرح كبير يا وجع كبير. وتختار تبعد ؟ بتعيش برا الأمان... لكن برضو برا الوجع. وأصعب لحظة .... لما تكون واقف بين خيارين كل واحد فيهم فيهو حتة منك حتة ما بتقدر تفرط فيها بسهولة. مرات بنختار غلط .... لكن الغلط دا بعلمنا أكثر من ألف نصيحة بخلينا نشوف نفسنا بوضوح وبنكتشف إنو نحنا ما كنا عارفين روحنا زي ما كنا فاكرين. ومرات بنختار صح.... لكن الطريق ذاتو بيكون متعب عشان الصح ما دايماً ساهل ولا دايماً مريح ... لكن نهايتو بتطمن. یا زول ما تخاف من الاختيار خاف من إنك تعيش حياتك كلها واقف لا مشيت لا رجعت لا عشت لا ارتحت اختار... حتى لو قلبك بيرجف اختار... حتى لو خايف تغلط لأنو الغلط ذاته خطوة لكن الوقفة مكانك ... دي النهاية البتجي بدون ما تحس. وخلي في بالك حاجة مهمة: ما في اختيار كامل وما في طريق بدون شوك لكن في طريق بيمشي معاك وطريق بيمشي ضدك. ف اختار الطريق البتحس فيهو إنك إنت الطريق البتلقى روحك فيهو حتى لو كان أطول، حتى لو كان أصعب. وفي النهاية .... لو رجعت يوم سألوك ليه اخترت كده؟ قولها وانت رافع راسك لأنو دا كان أنا ... وما قدرت أكون غيري.🤍✨️ - @useriz0ud92cgw