@aqdariga: Енді жолдағы ахуалды онлайн бақылауға болады Елімізде жыл сайын мыңдаған жол-көлік оқиғасы тіркеледі. Былтырдың өзінде 3 582 апат болған, оның үштен бірі жүк көліктерінің қатысуымен орын алған. Ал жол қозғалысының қарқыны жыл сайын 18–20 пайызға артып отырған жағдайда бұл сан өсе береді. Себебі ұзақ уақыт бойы 25 мың шақырым республикалық жолдың басым бөлігі нақты уақытта бақыланбады. Бүгінде “ҚазАвтоЖол” ұлттық компаниясы осы олқылықтардың орнын толтыруға бағытталған геопорталды іске қосты. Жүйе 26 ақылы жол учаскесіндегі 4 900 шақырымды нақты уақытта қадағалайды, 1 500-ден астам арнайы техниканы GPS арқылы бақылайды, жанар-жағармай шығынын талдайды, жалған транзитті және маршруттан ауытқуларды анықтайды. Сонымен бірге барлық су өткізу құбырлары мен жол жұмыстары цифрлық форматқа толық көшірілді. Қарапайым тілмен айтқанда, бұл жүйе бізге не береді? Бұл портал — жол бойындағы тәртіпті реттейтін үлкен цифрлық бақылаушы сияқты. Енді қай жерде жол жөнделіп жатыр, техника расымен жұмыс істеп тұр ма, әлде бос тұр ма бәрі онлайн көрінеді. Жүк көліктері де назарда болады: олардың шамадан тыс жүк тиеп жолды бұзуына немесе белгіленген маршруттан ауытқып кетуіне жол берілмейді. Егер жолда апат немесе төтенше жағдай болса, жүйе оны дереу тіркеп, жедел көмек көрсетуге мүмкіндік береді. Қысқасы, мемлекет жолды тек салып қана қоймай, оның әрбір шақырымын сапалы сақтау үшін нақты бақылау құралына ие болды. Бұл жолдың ұзақ шыдауына және сапардың қауіпсіз болуына жасалған маңызды қадам.

aqdariga

Open In TikTok:

Region: KZ

Monday 04 May 2026 16:39:40 GMT