የቱርክ መካከለኛ ቦታ ላይ የሚገኝ ከተማ ውብ ፈረሶች የሚኖሩበት ለማለት የወጣላት ስም ነው። በመጸ‍እሐፍ ቅዱስ ኬጢያውያን የሚባሉት ሕዝቦች ቦታ ናት። ኬጢያውያን የታወቁ ፈረስ ጋላቢዎች ነበሩ። በበዓለ ጰራቅሊጦስ በ ኢየሩሳሌም ተገኝተው ክርስትናን ከተቀበሉት መካከል የቀጰዶቅያ ሰዎች ይገኙበታል። ቅዱስ ጴጥሮስ መልእክት የጻፈላቸው ምእመናን መካከልም የቀጰዶቅያ ምእመናን ይገኙበታል። ይሄ ማለት በ እስጢፋኖስ ሞት ምክንያት ተሰደው ከገቡባቸው አገሮች አንዷ ቀጰዶቅያ ነበረች ማለት ነው። የዋሻ ውስጥ ከተማ ይገኝበታል የጥንት ክርስቲያኖች የሠሩት ከተማ ነው። እጅግ አስደናቂ ነው። አስጎብኛችን እንደነገረን ከሠላሳ ሺህ በላይ ሕዝብ መያዝ የሚችሉ የፀሐይ ብርሃን የሚያገኙበት፣ ነፋስ የሚቀበሉበት ታስቦ የተሠራላቸው ክፍሎች ያሏቸው ናቸው። የጸሎትና የአምልኮ ስፍራዎችም አሏቸው። በመንገዳችን ያየናቸው ከወጥ ዐለት የተሠሩ ቤቶች በጣም አስገራሚ ነበሩ። ተራራውን ተጠግተው የተሠሩ ከተሞች ሁሉ ጥንታዊውን ቤት ከዘመናዊ ጋር አስተባብረው በመያዛቸው ለማየት አይጠገቡም። አየናቸው፣ አየናቸው፣ ተደመምንባቸው፣ ፎቶ ተነሣንባቸው። አሁን ኑሲስ NYSSA ተብላ በታሪክ ወደ ታወቀችው የቅዱስ ጎርጎርየ‍ኦስ መንበር ለማደር እየገባን ነው። ከ372-394 ቅዱሱ ሊቅ እንደ ምሰሶ ተተክሎ ዓለምን የሚመግብ ትምህርትን ያስተማረባት ከተማ ናት። ያች 372 ዓ.ም ዛሬ በሆነች ኖሮ ምን አለበት? ነገረ ሥጋዌን ጠይቀነው ቢመልስልን፣ መጻሕፍትን ሲተረጉም በጉባኤው ተገኝተን ብናደምጠው ብለን ተመኘን። ያን ጊዜ አርዮሳውያን ታጥቀው ቤተ ክርስቲያንን በሚዋጉበት ዘመን የሃይማኖትን ምሥጢር የሚገልጡ ሊቃውንትን ሲያስነሣ አንዱ ይህ ቅዱስ ጎርጎርዮስ ነበር። የኑሲስ መንበር የመጀመሪያው አባት እንደሆነ በታሪክ ይታወቃል። ኑሲስ ያለ ጎርጎርዮስ ትንሽ መንደር ናት። ዓለምን የሞላ ስም ያገኘችው ይህንን ሊቅ ተሸክማ ነው። ሐውልት ሳታቆምለት በመላው ዓለም ሐውልት ያቆመላት ሊቅ። በ እርግጥ እሷ ስሟንም ግብሯንም ለውጣ ሁሉንም ነገር ረስታለች። ኑ ቅዱስ ጎርጎርዮስ ዜና ሕይወቱ ለሙሴን The life of Moses ይንገረን፤ ስለተወደደችው እኅቱ ማክሪና ይተርክልን። ስለ ታላቁ ባስልዮስ ቅድስና ስለ ጎርጎርዮስ ዘእንዚናዙ ይንገረን። ብሉያትን ሐዲሳትን ይተርጉምልን? ሚያዚያ -2018 ዒ.ም ቀጰዶቅያ / Cappadocia - ቱርክ ስምዓኮነ መልአከ / Simakone Melak - @simakonemelake