Way xanuun badan tahay marka aad dusha ka dhoola-caddaynayso, balse gudahaaga uu ka taagan yahay isfahan la’aan, murugo iyo khilaaf aan dhammaanayn. Dadku waxa ay arkaan wajigaaga oo daggan, qosolkaaga iyo sida aad isu adkaynayso, balse ma arkaan dagaalka qalbigaaga ka socda. Waxa jira habeenno aad aamusto adigoo dhaawac qarinaya, iyo maalmo aad dadka la dhex joogto adigoo gudaha ka burbursan. Ma kugu ceebaynayo tagitaankaaga, mana kugu canaananayo inaad nolol kale dooratay. Qof kastaa waxa uu xaq u leeyahay jidka uu doono inuu maro iyo meesha uu qalbigiisu ku xasilo. Laakiin waxa aan qarin karin ayaa ah in tagitaankaagu dhaawac reebay. Waxa aad iga tagtay xasuuso, su’aalo iyo qalbi muddo dheer aamusan oo xanuun la nool. Mararka qaar qofku ma ooyo sabab uu qof u neceb yahay, ee waxa uu u ooyaa sabab uu si dhab ah u jeclaa. Noloshu sidaan kuma sii ahaan doonto. Xanuunkan maanta culus ma ahaan doono mid weligiis sii jira. Maalin uun waxa iman doonta waqti aynu dib u eegno wax walba annagoo ka bogsannay dhaawacyadii ina soo maray. Anigu waan guulaysan doonaa, adiguna waad guulaysan doontaa. Waxa laga yaabaa inaan kala fogaano, balse ma lumin doono casharradii aynu iska barannay iyo xusuusihii mar uun qalbigeenna qurxiyey. Waxaan kuu rajaynayaa nolol wanaagsan, daganaan iyo farxad aad ka hesho jidka aad dooratay. Haddii aanan noqon qofka kula sii socda safarkaaga, ugu yaraan waxaan ahaa qof si dhab ah kuu jeclaa oo kuu rajeeyey wanaag. Nabad gelyo… Noloshuna ha kuu wacnaato. - @1fazter