@mhasko3: الدهب ،،،،، التراب البيشيل الروح قبل العمر 🌵 المنجم ما حفرة في الواطة وبس ، المنجم دا قبر مفتوح . بتدخلو برجليك وانت حي ، وما ضامن تطلع منو. بنصحى قبل الفجر ، والمعول في الكتف تقيل كأنو شايل هم الدنيا كلها. ننزل البير والضلام يبلعنا ، ريحة التراب والموية المالحة تخنق ، وصوت الناس يضرب في الصخر كانو بيضرب في ضلوعك وصدى أنفاسهم تتعالى في شهيقهم وزفيرهم ، يدك تتشقق ، ضهرك ينكسر ، وعرقك ينزل يملح عيونك ، تقول الليلة ، الليلة الله بيفرجها . تحفر ،يوم ،أسبوع، شهر ، تفتت الحجر بسنونك لو لزم ،تبيت في الخلا البرد ياكل عظمك، تبعد من اولادك مرات بالسنين ، تقول معليش عشان بكرة يرتاحو ، تتوحم على لقمة نضيفة ونومة في بيتك ، لكن تقول الصبر طيب . ،،،،، وفجأة! تلقي الجرام ، جرام واحد بعد موت احمر ، تحسبها تلقاها خسرانة ، حق الأكل والدين والبنزين، اكتر من البريق البيكذب ده . صاحبك الجمبك رزقو ضرب ، طلع بكوم دهب ، وانت ترابك فالصو . بتسأل نفسك ؟ ليه انا ما تعبت ؟ انا ما سافرت ؟ بيقولوا ليك الدهب رزق . والرزق ما بجي بالقوة . لكن كيف تقنع رجليك اللي ورمن من الوقفة ؟ 😔 كيف تقنع كتفك المأكول من رفع الشوالات ؟ المنجم علمنا انو التعب براهو ما بيجيب قروش ، علمنا انو ممكن تفني شبابك في حفرة ! وتطلع منها بيدين فاضيين وقلب مليان غبن . الدهب دا كذاب ، بيلمع ليك من بعيد ، يسحبك ليهو ،ولما تقرب بيوريك وشو التاني 😄 وش التراب ، وش الخسارة ، وش العشم البيموت كل مغربية مع الشمس. ما اي بئر فيها موية ، وما اي منجم فيهو دهب ، ومرات الرزق بيكون في العافية الطلعت بيها ، في أنك رجعت لأهلك حي ، لكن منو بيقتنع ؟ طول ما الجيب فاضي القلب ، بيظل جعان . الخلاصة انو ما تفقد املك الرزق ما في الدهب بس اللهم ارزق كل من عانا وتعب أن لا تذهب تعبه سداً يا رب. تحيااااااااتي لكككككككككككم احبتي #دهابة #الدهب_التبري_دهب_السودان✊ #دهابة_عز_وفخر💪🏼 #ابوحمد #الشمالية
