دوپہر کی تیز دھوپ تھی۔ زمین گرم تھی، ہوا خشک تھی، مگر اس سے بھی زیادہ خشک شاید اس معاشرے کے ضمیر ہو چکے تھے۔ ایک طرف سبز اور تازہ چارہ رکھا تھا۔ گائیں، بھینسیں سکون سے کھا رہی تھیں۔ دوسری طرف ایک گدھا کھڑا تھا… خاموش… تھکا ہوا… گرد سے اٹا ہوا… اور اس کے سامنے سوکھی توڑی پڑی تھی۔ وہی گدھا جس کی پیٹھ پر یہ سارا سبز چارہ لاد کر لایا گیا تھا۔ میں کافی دیر تک اس منظر کو دیکھتا رہا۔ پھر اچانک میرے دل میں ایک عجیب سا سوال پیدا ہوا: “آخر انصاف کس چیز کا نام ہے؟” جو سب سے زیادہ بوجھ اٹھائے… کیا اس کا حصہ سب سے کم ہونا چاہیے؟ جو پورا دن دوسروں کے لیے رزق ڈھوئے… کیا رات کو اس کے نصیب میں صرف سوکھی توڑی آنی چاہیے؟ لوگ کہتے ہیں گدھے میں عقل نہیں ہوتی۔ شاید واقعی نہیں ہوتی… کیونکہ اگر عقل ہوتی تو وہ ایک دن ضرور سوال کرتا: “میری محنت کا پھل دوسروں کے حصے میں کیوں جا رہا ہے؟” پھر اچانک مجھے لگا… یہ صرف ایک گدھا نہیں… یہ پاکستان کا مزدور ہے۔ وہ مزدور جو صبح فجر سے پہلے اٹھتا ہے، اینٹیں اٹھاتا ہے، ریڑھی لگاتا ہے، فیکٹری میں جلتا ہے، دھوپ میں پسینہ بہاتا ہے، اور پھر بھی شام کو اس کے بچوں کے نصیب میں مکمل کھانا نہیں آتا۔ یہ وہی مزدور ہے جو ہر چیز پر ٹیکس دیتا ہے۔ آٹے پر ٹیکس… چینی پر ٹیکس… صابن پر ٹیکس… پٹرول پر ٹیکس… کرائے پر ٹیکس… دوائی پر ٹیکس… حتیٰ کہ وہ سانس لے تو شاید اس پر بھی کوئی ٹیکس لگا دیا جائے۔ اور انہی ٹیکسوں سے بڑے بڑے محلات روشن ہوتے ہیں۔ سرکاری گاڑیوں کے پروٹوکول چلتے ہیں۔ وزیروں کے دسترخوان سجتے ہیں۔ حکمرانوں کے ایئرکنڈیشن کمروں میں فیصلے ہوتے ہیں۔ مگر جس قوم کے خون پسینے سے یہ سب عیش قائم ہے… وہی قوم آج بھی سوکھی توڑی کھا رہی ہے۔ بالکل اس گدھے کی طرح۔ افسوس صرف حکمرانوں پر نہیں… افسوس اس قوم پر بھی ہے جو ہر بار بوجھ اٹھاتی ہے، ہر بار لٹتی ہے، ہر بار استعمال ہوتی ہے، اور پھر بھی خاموش رہتی ہے۔ مردہ قومیں شور نہیں کرتیں… وہ صرف بوجھ اٹھاتی ہیں۔ اور زندہ قومیں؟ وہ سوال کرتی ہیں۔ اپنے حق کے لیے کھڑی ہوتی ہیں۔ اپنے بچوں کے مستقبل کے لیے آواز اٹھاتی ہیں۔ یہ تصویر صرف ایک جانور کی تصویر نہیں۔ یہ پورے معاشرے کا آئینہ ہے۔ جہاں محنت کرنے والا کمزور ہے… اور اس کی محنت پر پلنے والا طاقتور۔ جہاں پسینہ بہانے والا بھوکا ہے… اور پسینہ بیچنے والا امیر۔ اگر آج بھی اس قوم نے نہ سوچا… تو کل ہر مزدور، ہر غریب، ہر نوجوان اسی گدھے کی طرح ہوگا… جس کی پیٹھ پر پورا نظام کھڑا ہوگا، مگر اس کے حصے میں صرف سوکھی توڑی آئے گی۔ — جنید #UrduPoetry #Poetry #DeepPoetry #SadPoetry #RealityPoetry - @junaidalijunaid016