الرد على @ismailnani249 من نظرة عين بس… الحكاية كلها بتبدأ، بدون مقدمات، بدون ترتيب… كأنو القلب اتفق مع العين قبل العقل حتى يفهم الحاصل شنو. مرات بتكون قاعد عادي، لا في بالك حاجة، وفجأة تقع عينك في عين زول… تحس الزمن وقف، والكلام اختفى، والدنيا كلها بقت ساكنه… بس في إحساس واحد شغال جواك، إحساس ما عندو اسم واضح، لكن بتفهمو كويس. في عيون بتونسك من أول لحظة، تحسها قريبة منك رغم المسافة، كأنك عارفها من زمان شديد. وفي عيون تانية… بتوجعك ساي، بدون سبب مفهوم، كأنها شايلة وجع ما اتحكى، وبتحاول تقول ليك: "أنا تعبت…" نظرتك لي… كانت مختلفة، ما زي أي نظرة مرت علي… كان فيها أمان غريب، وراحة ما متعودة عليها، كأنك بتطمني بدون ما تتكلم، وبتقربني ليك بدون ما تتحرك. وأنا… لقيت نفسي بغرق في التفاصيل الصغيرة البتظهر في عيونك، لمعة خفيفة لما تفرح، وهدوء عميق لما تسكت، وحزن بسيط بتحاول تخبيه… لكن بيظهر غصباً عنك. بقيت أقرأك من عيونك، أفهمك من نظرة، وأحس بيك حتى لو ما قلت ولا كلمة. الغريب في الموضوع… إنو في نظرات بتعدي عادي، ما بتأثر، وفي نظرات بتقعد جواك، تفضل معاك، كل ما تتذكرها… قلبك يدق بطريقة مختلفة. نظرة عين واحدة… ممكن تخليك تحب، وممكن تخليك تتعلق، وممكن كمان تخليك تخاف… لأنك حسيت بحاجة حقيقية. أنا بقيت أخاف من النظرات القوية، لأنها صادقة زيادة عن اللزوم… والصدق مرات بكون تقيل، خاصة لو جاك فجأة. لكن برضو… ما قدرت أهرب منها، لأنو في إحساس جميل فيها، إحساس يخليك عايز تقعد أكتر، تشوف أكتر، وتفهم أكتر. يمكن عشان كدا… أنا بقيت أصدق العيون أكتر من الكلام، لأنو الكلام ممكن يتزين ويتغير، لكن العين… العين دايماً بتفضح الحقيقة، حتى لو حاولت تدسها. - @.gueen681