@den.v3r: زۆر جار دەڵێن(بۆچی خەڵک جلی ئەوروپی دەپۆشن و کەس ناڵێت کلتوری بێگانەیە، بەس کە دێتە سەر نیقاب دەڵێن کلتوری عەرەبە؟) ئەم بەراوردکارییە زۆر سادە و چەواشەکارانەیە! کاتێک کچێک یان کوڕێک پانتۆڵ و کراس یان چاکەت دەپۆشێت، وەک پۆشاکێکی جیهانی هاوچەرخ دەیپۆشێت بۆ کار و ژیانی ڕۆژانە؛ وە ئەو کەسە چرکەیەک ئیدیعای ئەوە ناکات کە ئەم جلانە فەرمانی خودایە، پیرۆزیی ئایینییە، یان پێوەری موسڵمانێتییە. ئەوروپییەکان نەهاتوون جلی خۆیان بە ناوی ئایینی بەسەر ئێمە بسەپێنن، بەڵام کێشەی ئێمە لەگەڵ نیقاب ئەوەیە کە ئێوە دێن کلتورێکی خێڵەکیی بیابان دەپۆشن و دەڵێن ئەمە ئایینە! خۆ ئێوە ئەگەر هەر جلێکی تری عەرەبی، یان تەنانەت خودی نیقابەکەش وەک حەز و ئازادی کەسی خۆتان بپۆشن، کەس هەقی بەسەرتانەوە نییە و ئازادن بەڵام کاتێک دەیکەن بە پێوەری ئایین و شەرع، لێرە کایەکە دەگۆڕێت. لە بەرامبەردا زۆرجار ڕەخنە دەگرن و دەڵێن (ئێستا جلی کوردی گۆڕاوە و زۆر پۆشتە نییە!) کەم تا زۆرێک ئەمە ڕاستییەکی تێدایە، بەڵام ئایا ئەمە ئەسڵی کێشەی جلی کوردییە؟ نەخێر. ئەمە بڕیار و ڕەفتاری خودی مرۆڤەکەیە کە چۆن جلەکە دەستکاری دەکات و دەیپۆشێت، نەک ئەوەی جلی کوردی لە ئەسڵدا ڕووت و قوت بوبێت! ڕێک وەک چۆن زۆرجار دەبینین هەندێک کچ نیقاب دەکەن تا شوویان دەستکەوێت یان بۆ دزی دەیکەن، ئایا ئەمە مانای وایە ئەسڵی نیقابەکە خراپە؟ کەواتە چۆن کاتێک کچێک دەستکاریی جلی کوردی دەکات پەلاماری جلی کوردی دەدەن و دەڵێن جلەکە داپۆشراو نیە وە ڕووتە، بەڵام کە کچێک نیقاب بۆ مه‌بستی تر بەکار دەهێنێت ناڵێن ئەسڵی نیقابەکە کێشەی هەیە؟ ئەمە پێوەرە دوو فاقییەکەیە. جا دۆستان هەندێک گەلحۆ و نەفام هاتوون وێنەی نیقابی خێڵەکی کۆن کە پڕە لە خشڵ و زێڕ دەخەنە لایەک و دەڵێن (ئەمە هی عەرەبە و بۆ خۆعەرزکردنە)، بەڵام ئەم نیقابە ڕەشە سادەیەی ئێستا دەخەنە لایەکی تر و دەڵێن (ئەمە دینە!) ئەم بەشکردنە گەورەترین گاڵتەجاڕیی مێژوویی و فیکرییە. نیقابەکە هەر نیقابە، تەنها مۆدێل و کلتورەکەی لە شێوازێکی خێڵەکیی کۆنەوە گۆڕاوە بۆ فۆڕمێکی سیاسی ئایینی هاوچەرخ کە لە سەدەی بیستەم هاوردە کرا. گۆڕینی مۆدێل شتێکی کلتوری ناکات بە دین! قورئان لە ئایەتی ٣٠ی نور دەڵێت (بە پیاوانی باوەڕدار بڵێ چاویان بپارێزن). ئەگەر ژن لە ناو قاوغێکی ڕەشی تەواو داخراو بێت، پیاو چاو لە چی بپارێزێت؟ لە تارماییەک؟ لە قوماشێکی جووڵاو؟ وە لە بەرامبەردا کاتێک لە ئایەتی ٣١ی نور دەڵێت (جگە لەوەی کە خۆی بە دەرەوەیە) ئەمە بەو مانایەیە کە شتێک لە جەستە هەیە کە پێویست ناکات بشاردرێتەوە و سروشتی خۆی وایە لە کاتی مامەڵەی ڕۆژانە دیار بێت. کەچی ئەوان دێن دەڵێن مەبەست لێی عەباکەیە! ئاخر جل کەی بەشێک بووە لە جوانی جەستە (زینة) تا خودا بڵێت مەگەر ئەوەی دیار بێت؟ جل خۆی پۆششە. ئازادیی پۆشاک بۆ هەمووان پارێزراوە، بە مەرجێک نەریتی نەتەوەیەکی تر بە ناوی دینەوە بەسەر کۆمەڵگادا نەسپێنرێت و کچانی تری پێ تاوانبار نەکرێت. ئایینەکە ڕوونە، بەس مێشکی داخراو دەیەوێت کلتوری خێڵەکی بکات بە ئیسلام. ئیسلام بۆ هەموو مرۆڤایەتی هاتووە، بۆیە عەقڵانی و مەنتقی نییە کلتور و پۆشاکی ناوچەیەکی دیاریکراو وەک فەرز بەسەر تەواوی جیهان بسەپێنێت. خودا داوای پۆشتەبوون و حیشمەت دەکات، نەک پۆشینی نیقاب و کلتوری بیابان! هەموو گەل و نەتەوەیەکی سەر زەوی، پۆشاکی شەرعی و داپۆشراوی خۆی هەیە کە لەگەڵ ژینگە و کلتورەکەی دەگونجێت، کورتکردنەوەی دینداریش لە پارچە قوماشێکی هاوردەکراو، سوکایەتییە بە جیهانیبوونی پەیامی ئیسلام. دێنڤێر. #foryou #fyp #tiktok #fip

دێنڤێر

Open In TikTok:

Region: IQ

Saturday 16 May 2026 19:36:24 GMT