@paygham_e_sarosh: تو ابھی رہ گزر میں ہے قیدِ مقام سے گزر مصر و حجاز سے گزر، پارس و شام سے گزر معانی: رہ گزر: راستہ سے گزرنے والا ۔ قیدِ مقام: ٹھہرنے کی قید ۔ مطلب: ان اشعار میں انھوں نے اپنے خصوصی انداز میں دنیا بھر کے مسلمانوں سے خطاب کرتے ہوئے کہا ہے کہ تم لوگ تو ابھی تک نا آشنائے منزل ہو ۔ ابھی تک راستے میں ہی بھٹک رہے ہو ۔ لہذا اگر اپنے مقصد کی تکمیل کرتے ہوئے منزل تک پہنچنے کے خواہاں ہو تو پھر یہ مصر و حجاز اور ایران و شام کی حدود سے آگے بڑھنا ہو گا کہ مسلمان کے لیے یہ جغرافیائی حدیں بے معنی شے ہیں ۔ عملاً یہ جغرافیائی حدود کا تصور تو یہاں یورپی تہذیب کی درآمدات میں سے ہے جب کہ مسلمان کی تو ایک ہی قومیت ہے وہ خواہ عرب میں بودوباش رکھتا ہو یا عجم ! بہرحال مسلمان ہے اور اس کی قومیت مشترک ہے ۔ جس کا عمل ہے بے غرض اس کی جزا کچھ اور ہے حور و خیام سے گزر، بادہ و جام سے گزر معانی: حور وخیام: بہشتی حسینائیں اور ان کے خیمے ۔ بادہ و جام: شراب اور شراب کا پیالہ ۔ مطلب: اس شعر میں علامہ اقبال کہتے ہیں کہ جو شخص سیرت و کردار کے حوالے سے بے غرض اور حرص و ہوس سے دور ہو گا خداوند قدوس اس کو خصوصی طور پر اس عمل کی جزا دیتا ہے ۔ لہذا ضروری ہے کہ بہشت تک رسائی کے لیے حور و غلماں اور شراب طہورہ کے خیال سے بے نیاز ہو کر نیک نیتی کے ساتھ اپنے عمل میں مصروف رہا جائے کہ اس نوعیت کا عمل تو ہر قسم کی جزا سے بلند ہے ۔ تیرا امام بے حضور، تیری نماز بے سرور ایسی نماز سے گزر، ایسے امام سے گزر معانی: بے حضور: غیر حاضر ۔ بے سرور: بے لذت ۔ گزر: چھوڑ دے ۔ مطلب: اس میں شک نہیں کہ اس شعر میں بھی اقبال مسلمان سے مخاطب ہیں لیکن یہاں ان کا لہجہ خاصا تند و تیز ہے ۔ فرماتے ہیں کہ تو جس امام کی قیادت میں خدائے عزوجل کے حضور میں سجدہ ریز ہو رہا ہے اس امام کو تو خود بھی حضوری کا درجہ حاصل نہیں کہ اس کی نیت اور عمل منافقانہ ہے ۔ اسی سبب تیری نماز بھی بے کیف ہو کر رہ گئی ہے چنانچہ تیرے لیے مناسب یہی ہے کہ ایسے بے کیف سجدوں اور اس طرح کے بے عمل اور منافق امام کی قیادت سے دستبردار ہو جا ۔ مراد یہ ہے کہ جب راہ نما خود ہی بے عمل اور بد دیانت ہوں تو ایسے لوگوں کی قیادت کو تسلیم نہیں کرنا چاہیے بلکہ ان سے گریز کرنا چاہیے ۔ #allamaiqbal #allamaiqbalpoetry #allamaiqbalshayari #urdusadshayari