Ma ogtihiin dareenka ah inaad muraayadda is hortaagto, ka dibna aad is garan weydo? Inaad aragto qofka muraayadda ku dhex jira oo ah lafo iyo maqaar, indhihiisuna ay ka muuqato quus iyo geeri? Bilo ka hor, waxaan ahaa qofkaas. Waxaan gaaray heer aan miisaankayga lumiyo (6kg), oo aan u ekaado qof xanuun u dhimanaya. Ma ahayn xanuun jireed, ee wuxuu ahaa xanuunka ‘Dulmiga’. Waxaan gaaray heer aan waali u dhowaado, oo maskaxdaydu ay xamili weydo cadaadiska, ilaa la ii geeyay Dhakhtar Cilmi-nafsi. Ma qiyaasi kartaan xanuunka ay leedahay in dadkii aad aamintay ay fikradaadii xadaan, ka dibna ay kugu yiraahdaan: ‘Ma tihid qof jira, waxba ma qaban kartid.’ Waxay bilaabeen inay magacayga ku dhex tuuraan dhoobada, iyagoo i magac-dilaya, i hanjabaya, xataa waalidkayga oo aan waxba galabsan ayay been ka sheegeen si ay ii niyad jabiyan Habeenada qaar, waxaan fadhiisan jiray geeska qolkayga anigoo gariiraya, anigoo isweydiinaya: ‘Miyay noloshaadu halkan ku dhamaanaysaa? Miyay ku guulaysteen inay ku dilaan?’ Waxay isku dayeen inay iga dhigaan qof ‘Emotional’ ahaan dhintay, oo aan marnaba dib u soo kici karin. Laakiin maanta… maanta markaan halkan taaganahay, waxaan rabaa inaan u sheego dadkii i dulmiyey: ‘Maydan iga guulaysan.’ Ilaahay wuxuu iga soo saaray godkii madobaa ee aad igu rirteen. Dhib kasta oo aad ii geysateen wuxuu ii ahaa jaranjaro aan ku gaaro heerka aan maanta joogo. Maanta ma ihi dhibane, waxaan ahay halyey ka soo ka guulaystay quusta iyo waalida. Dhalinyarada Soomaaliyeedow, haddii aad maanta dareemayso in naftu kaa quusatay, xasuuso Yasser. Xasuuso in habeenka ugu madow uu yahay kan waagu ka dambeeyo. Ha quusanina, waayo Ilaahay ma illoobo qof la dulmiyey. - @yavick123