@karakiya_ms: Маңғыстауда жол қауіпсіздігі мәселесі талқыланды Маңғыстау облысының прокуратурасында жол қозғалысы қауіпсіздігін қамтамасыз ету саласындағы заңдылық мәселелеріне арналған үйлестіру кеңесінің отырысы өтті, деп хабарлайды otpannews.kz. Жиынға құқық қорғау органдарының, жергілікті атқарушы органдардың және уәкілетті қызметтердің басшылары қатысты. Облыс прокуроры Серікқали Күшәлиев жол қауіпсіздігі мәселесі өңірдегі өзекті проблемалардың бірі болып қала беретінін айтты. “Жолдағы қауіпсіздік - тек полицияның немесе мемлекеттің ғана міндеті емес. Бұл әрбір жүргізуші мен жол қозғалысына қатысушының жауапкершілігі. Басты мақсат - адам өмірін сақтау және қоғамда заң бұзушылықтарға мүлдем төзбеушілік қағидатын қалыптастыру”, – деді облыс прокуроры Серікқали Күшәлиев. Ведомство мәліметінше, биылғы жылдың алғашқы үш айында өңірде 297 жол-көлік оқиғасы тіркелген. Бұл көрсеткіш бойынша Маңғыстау облысы республикада 8-орында тұр. Кеңесте жол апаттарының негізгі себептері жүргізушілердің жол қозғалысы ережелерін бұзуы екені атап өтілді. Сонымен қатар облыстағы автомобиль жолдарының жағдайы жалпы нормативтік талаптарға сәйкес келетіні айтылды.
