ንሕና ኤርትራውያን ካብ ዓዲ ወጺእና ኣብ ኢትዮጵያ፡ ዩጋንዳ ወይ ሊብያ ኣብ ዘለናሉ ግዜ፡ ናብ ዩናይትድ ኪንግደም (UK) ምእታው ከምቲ ዝዓበየን ናይ መወዳእታን ዓወት ኢና ንርእዮ። ሓደ ሰብ ወረቐት ረኺቡ ወይ ብዝኾነ መገዲ ዩኬ ኣትዩ ምስ ተባህለ፡ ኩሉ ጸገማቱ ከም ዘብቀዐን ናብ ገነት ከም ዝኣተወን ጌርና ኢና ንሓስብ። እቲ ሓቂ ግን እግሪ ምስ ረገጽካ እዩ እቲ ሓዱሽ ኲናትን ቃልስን ዝጅምር። እቲ ኣብ ማሕበራዊ መርበባት ዝርአ ስእልታትን ቪድዮታትን ነቲ ኣብ ውሽጢ ዘሎ ቃንዛን ድካምን ስለ ዘየርእየና፡ ብሩህ ተስፋ ጥራይ ሒዝና ንመጽእ። ዩኬ ምስ በጻሕካ ግን እቲ ዓወት ዝመስል ዝነበረ ተስፋ ናብ ካልእ መልክዕ ይቕየር፤ እቲ ቛንቛ ክሳብ ዝምለኽን እቲ ስርዓት ክሳብ ዝርድኣካን ከም ሓዱሽ ሕጻን ተወሊድካ ካብ ባዶ ክትጅምር ስለ ዘለካ፡ እቲ ስነ-ልቦናዊ ጸቕጢ ኣዝዩ ከቢድ እዩ ዝኸውን። ኣብ ኣፍሪቃ ከለና ዝለመድናዮ ማሕበራዊ ጥምረት፡ ሰላምታ፡ ሓቢርካ ምብላዕን ምስሓቅን ኣብ ዩኬ የለን። ኣብዚ ዓዲ ሰብ ንሰቡ ግዜ የብሉን፡ ኩሉ ኣብ ውሽጢ ገዛኡ ተዓጽዩ ወይ ኣብ ስራሕ ተዋፊሩ እዩ ዝነብር። እቲ ጎረቤትካ መን ምዃኑ ከይፈለጥካ ዓመታት እትነብረሉ ናብራ ንሓደ ኤርትራዊ ኣዝዩ ጓናን ዘስንብድን እዩ። እዚ ብሕትውና እዚ ድማ ናብ ከቢድ ጭንቀትን ናይ ኣእምሮ ጸቕጥን ይመርሓካ። ሓሳብካ ንምግላጽ እትጥቀመሉ ቛንቛ እኳ ዓንቃጺ ስለ ዝኾነካ፡ ኣብ ማሕበረሰብ ከም ዝተገለልካ ኮይኑ እዩ ዝስምዓካ። እቲ ሰብኣዊ ርክብ ዝሑል ምዃኑ ጥራይ ዘይኮነስ፡ ሓድሓደ ግዜ እቲ ስውር ዓሌታዊ ኣድልዎ እውን ካልእ ተወሳኺ ጾር ይኾነካ። ብዙሕ ሰብ ስራሕ ምስ ሓዘ ኩሉ ዝተማልአ ይመስሎ፡ እቲ ሓቂ ግን ስራሕ ሒዝካ እውን ድኻ ኴንካ እትነብረላ ሃገር እያ ዩኬ። እቲ ካብ ጽሬት፡ ካብ መኽዘን ወይ ካብ ክንክን ኣረጋውያን ዝርከብ ደሞዝ፡ ፍርቁ ንክራይ ገዛ፡ እቲ ዝተረፈ ድማ ንቢላትን ንግብርን እዩ ዝኸይድ። ኣብ መወዳእታ ወርሒ ኣብ ኢድካ ዝተርፍ ገንዘብ ኣዝዩ ውሑድ ስለ ዝኾነ፡ ጽባሕ ንግሆ ስራሕ እንተ ኣቋሪጽካ ኣብ ጽርግያ ክትተርፍ ከም እትኽእል እናፈለጠካ ብጭንቀት ትነብር። እዚ ናይ "ሰራሕተኛ ድኻ" ህይወት ድማ ዕረፍቲ ይኸልኣካ፤ ለይትን መዓልትን እናሰርሓካ ግን ንርእስኻ እትኾን ገንዘብ ከተርፍ ኣይትኽእልን። እቲ ናይ ስራሕ ውሕስነት ዘይምህላዉ ድማ ኩሉ ግዜ ኣብ ስግኣት የንብረካ። ካብ ኩሉ ዝኸብድ ግን እቲ ካብ ዓዲ ዝመጽእ ትጽቢት እዩ። ኣብ ዓዲ ዘለዉ ስድራቤትና "ዩኬ ኣለኻ" ማለት ኣብ ልዕሊ ወርቂ ተቐሚጥካ ከም ዘለኻ ስለ ዝርድኦም፡ ንኹሉ ቁጠባዊ ጸገማቶም ናባኻ እዮም ዝጽውዑ። ንሕና ድማ ኣብ ዩኬ ዘሎ ጭቡጥ ናብራን ሕሰምን ክንነግሮም ንሓፍር ወይ ንኸይጭነቁ ንብል፤ ብሰንኪ እዚ ድማ ካብ ኣፍና ቆጢብና፡ ክራይ ገዛና ከይከፈልና ወይ ተለቃሒና ገንዘብ ንሰድድ። እዚ ድማ ነቲ ኣብ ዩኬ ዘሎ ቃልሲ ድርብ ይገብሮ። ስለዚ እቲ ዓቢ ዓወት ኢልና ዝሓሰብናዮ ናብ ዩኬ ምእታው፡ ንገዛእ ርእሱ ሓዱሽ ናይ ስደት ዓውዲ ኲናት እዩ። ዩኬ ናይ ሰላም ሃገር እያ እኳ እንተተባህለት፡ እቲ ዋጋኡ ግን ብርቱዕ ጻዕሪ፡ ብሕትውናን ስነ-ልቦናዊ ስባርን ምዃኑ ተረዲእና፡ ነዚ ሓቂ እዚ ተቐቢልና ክንመጽእ ይግባእ። #eritreantiktok🇪🇷🇪🇷habesha - @engtiglearn