من گال جوابچ كامل وممتاز بس خطچ يشبه خط الدجاج ومثل طلاسم السحر القاعة كلها هدت بضحكة قوية وأني بوقتها حسيت الدينا افترت بية ووجهي صار نار من الفشلة والعناد صعد لعقلي وگمت ووكفت على حيلي وگلتله بثقة وعين صلفة أستاذ مُهيب المهم المضمون والجواب كامل ومية بالمية والخط يتعدل بس الأسلوب المستفز والغرور شلون يتعدل؟ هنا القاعة سكتت وفرد سكتة والطلاب كلهم شهگوا وبقت العيون تتبادل بيني وبينه وهو عگد حواجبه وعيونه ورا المناظر صارت تجدح نار وتقرب بخطوات ثگيلة لحد ما صار يفصلني عنه الميز وبس وگال بنبرة هادئة ومخيفة بابا السانچ أطول منچ ومنا وجاي تطلعين برة قاعتي وعقوبة إلچ ما تدخلين إلا وأنتِ كاتبة المادة مال اليوم عشر مرات وبخط واضح ومفهوم؟ وندار وعافني وطلع من القاعة وأني لميت غراضي ودموعي بطرف عيني ورجعت للبيت الظهر وأني أفور وأريد بس أنفجر ودخلت وشمرت اغراضي بالگاع وتلگتني مرت عمي ها يمة بشريني شسويتي بالامتحان؟ وگتلها بغصة وعصبية عوفي يمة عوفي هذا الأستاذ المغرور طردني من القاعة وگال خطچ مثل خط الدجاج هوَ اليمت الدجاج يكتب وحلفت وعلي إلا أطلع الأولى وأكسر خشمه وبأثناء ما چنت أحچي وعصبيتي واصلة لحدها انفتح الباب ودخل أحمد وبصفه الأستاذ مُهيب لابس قميص اسود ويباوعلي بتك حاجب وابتسامة خفيفة ومستفزة وعبالك چان سامع كل الحچي وأحمد گال ها دُرة أستاذ مُهيب إجة اليوم يمنة حتى يراجع الأوراق مال مادتكم ويسولف وية عمي وبوقتها تمنيت الگاع تنشڪ وتبلعني من الفشلة وهو تقرب وگال لمرت عمي لا خالة ماكو داعي للعصبية دُر شاطرة بس يحتاج نعدل الخط واللسان شوية بالبيت وصعدت لغرفتي وأني أبچي من القهر وقفلت الباب وطلعت الدفتر وقررت أكتب المادة عشر مرات مثل ما گال بس هالمرة راح أكتبها بخط يخبل وأنعم خطي حيل حتى أتحداه وبقيت أكتب للفجر لحد ما إيدي تشنجت ومريم بنت عمي يمي تضحكك وياية وتواسيني وصار الصبح ورحت للمعهد ودخلت للقاعة وبگلبي نار تشتعل ودخل هو بهيبته ووكفت بثقة وتقدمت للميز ماله وشمرت الدفتر گدامه وگلتله تفضل أستاذ هاي المادة مكتوبة عشر مرات وبأحسن خط وهو لزم الدفتر وفتح الصفحات وبدأ يباوع بتركيز وهدوء وتالي رفع عينه بية ونزل المناظر الطبية وگال بصوت ناصي بس خلى جسمي كله يرجف... يتبع (حقوق rj8p4) - @rj8p4