@nvnoos__5: ‎ بورتسودان بالنسبة لي ما كانت مجرد مدينة قضيت فيها فترة ومشيت ‎كانت حياة كاملة عشتها بكل تفاصيلها، بالحامعة، بصاحبـاتي، بالمشاوير البسيطة، بالضحك بعد المحاضرات، وبالأيام الكانت بتمشي بسرعة شديد بدون ما نحس. ‎الجامعه هناك ما علمتني بس دراسة… علمتني الناس، الونس، الصبر، والارتباط بالأماكن بطريقة غريبة. علمتني كيف ممكن مدينة كاملة تدخل قلبك بدون استئذان، وكيف ممكن أصحابك يبقوا الجزء الألطف من يومك مهما كان تعبك. ‎والليلة وأنا بستعد أسافر حاسة كأنو في حاجة كبيرة جواي بتتفك بهدوء… ‎شعور غريب بين الامتنان والحزن، بين الفرحة إني ح أبدأ مرحلة جديدة، والزعل إني بخلي وراي أيام مستحيل تتكرر بنفس التفاصيل. ‎حتى البحر هناك… كان شاهد على حاجات كتيرة ما اتقالت. ‎على ضحكاتنا، على خوفنا من المستقبل، وعلى الأحلام الكنا بنحكي عنها كأنها أكيدة. ‎بورتسودان ح تفضل دائمًا الجزء الدافي من ذاكرتي ❤️#بورتسودان_البحر_الأحمر #السودان #يوميات #ذكريات