الإمام المهدي مو مجرد شخصيه دينيه تضهر بأخر الزمان، المهدي شخص موجود بيناتنه ويعرف كلشي يصير وياك ومتابعك ويحزن لحزنك ويفرح لفرحك، المهدي هو قائد وأب وأمل وأخ وصديق، صديق تشكيله كلشي، أخ يوكف وياك ويساندك، أمل يشرق حياتك ويشجعك، أب يرعاك ويهتم بيك، وقائد تعمل بأمره الرؤوف، صاحب الزمان يشتاقلنه احنه ويباوعلنه احنه المتدينين، صاحب الزمان ما راح يباوع لواحد ساقط، لا راح يباوع لانصاره، لو الواحد يعرف شكد يحزن صاحب الزمان لمن نحن نسوي ذنب جان يبقى طول عمره ما مسوي ذنب، صاحب الزمان شخص تشكيله وتحجي وياه وتبشره وتكله كلشي صار بيومك لمن تريد تنام، صاحب الزمان مو مجرد فكره أو شخص يضهر بأخر الزمان، صاحب الزمان صديق. صاحب الزمان متابع حياتنه ويعرفنه شجاي نفكر وشجاي نسوي ويعرف كلشي بحياتنه، صاحب الزمان يحبنه تره ويشتاقلنه لكن الي يحجبه عنه هو ذنوبنه، فهو يشتاقلك يريد يحجي وياك وتشوفه لكن ما يكدر بسبب ذنوبك، فهنا عرفنه اول نقطة نقترب من خلالها لصاحب الزمان وهي تقليل الذنوب، لأن الذنوب تضر بصاحب الزمان فوك ما تتخيل، فقوي نفسك وجاهدها لأجل إمام زمانك الي راح تنعمي عيونه من البجي بسبب ذنوبك. صاحب الزمان وحده، محد وياه محد يشوفه فصاحب الزمان دائما يشعر بالوحدة، لو واحد طول عمره يشعر بالوحدة ومحد يسولف وياه بعدين فجأه اجاله واحد وسولف وياه اكيد راح يحبه، نفس الشي صاحب الزمان لمن تجي وتسولف وياه راح يحبك وبالتالي راح يخليك تحبه فتصير علاقة حب بيناتكم، وهنا عرفنه ثاني طريقة الي هي الاسهل والأهم، انا كونت علاقتي اغلبها وي صاحب الزمان لأن احجي وياه قبل لا انام، قبل لا تنام شوف صاحب الزمان احجي وياه فضفضله احجيله مشاكلك كله شصار وياك اليوم حتى فرحك احجيله اياه (حتى لو بكلبك تحجي وي صاحب الزمان)، احجي وياه بلهجتك مو بالفصحى. من طرق الكلام مع صاحب الزمان اكيد زيارته، فانت دائما اقره زيارة آل ياسين حتى لو نصها واقره دعاء الفرج (اللَّهُمَّ كُنْ لِوَلِيِّكَ الحُجَّةِ بْنِ الحَسَنِ، صَلَوَاتُكَ عَلَيْهِ وَعَلَى آبَائِهِ، فِي هٰذِهِ السَّاعَةِ وَفِي كُلِّ سَاعَةٍ، وَلِيًّا وَحَافِظًا، وَقَائِدًا وَنَاصِرًا، وَدَلِيلًا وَعَيْنًا، حَتّى تُسْكِنَهُ أَرْضَكَ طَوْعًا، وَتُمَتِّعَهُ فِيهَا طَوِيلًا) واقره ادعيه وزيارات وانويها لصاحب الزمان وادعي لصاحب الزمان، وانطي عباداتك لصاحب الزمان، وأيضا ضروري لمن تروح للنجف زور بطريقك مسجد السهله (مسجد الإمام المهدي) واغلب الي شافوا الإمام شافوه بمسجد السهله. مرة طلاب حوزة احتاروا بسؤال (معقولة صاحب الزمان صارله 1000 سنة غايب، ما كملوا انصاره؟) فكالوا خل نودي أعبد واعلم واحد بينا لمسجد السهله يتعبد لحد ما يطلع اله الإمام المهدي حتى يسأله، فودوه وراح للمسجد يتعبد يتعبد يتعبد وماكو سجد رفع راسه لكه روحة مو بالمسجد، لكه روحه بمدينة، فسأل واحد احنه وين؟ كلاله بمدينة المهدي، فسأله وين الإمام؟ وصفله المكان، فراحاله لكن وكفه سكرتير الإمام كلاله الإمام ما يقابل واحد اعزب تزوج وارجع فالعابد كلاله انا هسه وين ارجع هو بس سؤال واحد، السكرتير كلاله روح للبيت الفلاني ينطوك مرة، فراح وكال لابو البنية السالفة فقبل يزوجه بعدين شافو بعض فلكاها آية من آيات الجمال، فخذتهم السوالف واثناء سوالفهم اجا سكرتير الإمام للعابد كلاله الإمام ينتضرك، العابد كلاله: كول للإمام دقيقة وهسه جايلك، بعدين أجا السكرتير بعد مرة يكله تره الإمام يأمرك يكلك تعال العابد يكول: بس دقيقة!، السكرتير بعدها هم أجاله يكله تره الإمام راح يروح فبقه يصرخ عليه يكله: دقيقة وهسه جاي!!، بعدين غمض عين فتح عين لكه روحه بعده بمسجد السهلة، هيج احتمال كلنه فلازم نتلاحك ارواحتنه. ــــــــــــــــــــــــــــــــــــــــــــــــــــــــــــــــــــــــــــــــــــــــ القناة تهدف لبناء انصار للإمام المهدي مكتفيين علميا واقوياء دينيا وجاهزين روحيا. - @user48588762101676