أصعب إحساس ممكن يعيشه بني آدم، هو إنه يكون عايش قصة حُب وهو مرعوب من نهايتها. أنا كنت بقعد معاها، باصص في عيونها، وبدل ما أفرح باللحظة، كان قلبي بيتنفض من الخوف.. كنت دايماً خايف من اليوم اللي المسافات تزيد بينا، خايف من ليلة برد أفتح فيها الموبايل وملاقهاش، خايف إنها تروح وتسيبني بطولي في نص الطريق. الخوف ده مكنش من فراغ، الخوف ده كان سهم بيموتني كل يوم بالبطيء، لأني كنت شايفها دنيتي وعمري كله ومكنتش متخيل حياتي من غيرها ثانية واحدة. ومن كتر خوفي عليها ومن غيابها، كنت باجي على نفسي كتير.. بكسر كبريائي عشانها، وبغفر الغلطة والتانية والتالتة، وبلتمس لها مية عذر وعذر عشان بس الحبل ميتشدش وتضيع مني. كنت بشتري أمانها بـ "حرقة دمي"، وبقدم لها اهتمام وخوف ودعم لدرجة إني نسيت نفسي في الزحمة، وكل ده عشان أثبت لها إن مفيش حد هيحبها ولا هيخاف عليها زيي.. كنت بحارب عشان ملقاش نفسي واقف في حطام ذكرياتها. وفي الآخر؟ اللي كنت خايف منه حصل، والرعب اللي عشته بقيت واقع بتنفسه كل ليلة. راحت وسابتني غرقان في الخوف اللي كنت بهرب منه، سابت الإيد اللي كانت متمسكة بيها لأخر نفس، ومفرقش معاها كل اللي عملته عشانها. الحقيقة المرة يا صاحبي، إنك لما تبين للشخص اللي قدامك إنك مرعوب من بعده، بيضمن وجودك، وبيبدأ يدوس على قلبك وهو مطمن إنك مش هتمشي. أنا خسرتها اه، بس اتعلمت الدرس الأقسى: إن اللي عايز يمشي هيمشي حتى لو قيدت له صوابعك العشرة شمع.. ومن النهاردة، اللي يستقوى بغلاوته، ملوش عندي غير الـ "بُعد" اللي يربيه. #ريبوست - @dailyreposts05