میں جانتا ہوں کہ تمہارے لیے تمہارا خاندان بہت اہم ہے۔ ان کی رضا، ان کی خوشی اور ان کا اعتماد تمہاری زندگی کا حصہ ہے۔اسی لیے میں کبھی یہ نہیں چاہوں گا کہ میری وجہ سے تمہارے دل پر دباؤ آئے، یا تم اپنے گھر والوں کے سامنے کسی مشکل میں پڑ جاؤ۔ محبت اگر سچی ہو تو وہ آسانی دیتی ہے، بے سکونی نہیں۔ وہ سہارا بنتی ہے، بوجھ نہیں۔ میں تم سے محبت ضرور کرتا ہوں، لیکن اس محبت میں خود غرضی نہیں رکھتا۔ میں تمہیں حاصل کرنے کے لیے تمہارے حالات، تمہاری مجبوریوں یا تمہارے خاندان کی عزت کو نظر انداز نہیں کر سکتا۔ کیونکہ میرے نزدیک محبت صرف کسی کو چاہنے کا نام نہیں، بلکہ اُس کی عزت، سکون اور خوشیوں کا خیال رکھنے کا نام بھی ہے۔ اگر تمہارے گھر والے راضی ہوں، اگر تمہارے نصیب میں میرا ساتھ لکھا ہو، تو میں پوری عزت کے ساتھ تمہارا ہاتھ مانگنے آؤں گا۔ لیکن اگر وقت کو ابھی کچھ اور منظور ہے، تو میں صبر بھی کروں گا اور دعا بھی۔ میں تم پر اپنی محبت کا بوجھ نہیں ڈالوں گا، نہ تمہیں کسی فیصلے پر مجبور کروں گا۔ کیونکہ مجبور کر کے حاصل کی گئی محبت کبھی سکون نہیں دیتی۔ میں چاہتا ہوں کہ اگر ہم ایک ہوں، تو دعاؤں کے ساتھ ہوں۔ تمہارے والدین کی رضا کے ساتھ ہوں۔ ایسے رشتے کے ساتھ ہوں جس میں کسی کی آنکھ نم نہ ہو، کسی دل پر بوجھ نہ ہو۔ کیونکہ محبت کا اصل حسن یہی ہے کہ وہ عزت سکھاتی ہے، صبر سکھاتی ہے اور انتظار کا حوصلہ دیتی ہے۔ میں انتظار کر لوں گا... وقت کا، حالات کا، اور اُس دن کا جب تم سکون سے یہ کہہ سکو کہ "اب سب راضی ہیں، آ جاؤ۔" اور یقین مانو، اُس دن میں صرف تمہیں لینے نہیں آؤں گا، بلکہ تمہاری عزت، تمہارے اعتماد اور تمہارے خاندان کے احترام کو ہمیشہ کے لیے اپنی زندگی کا حصہ بنانے آؤں گا۔ #ہیرارائٹس #vira - @heera.writes1