Waxyaabaha muhiimka ah ee ay tahay in la fahmo ayaa ah in shukaansigu uusan ahayn heshiis dammaanad leh, mana aha xiriir kuu xaqiijinaya in qofkaasi weligiis kuu sii joogi doono. Shukaansigu waa laba qof oo is baranaya, is fahmaya, isku dayaya inay ogaadaan inay dhab ahaan nolol wada dhisi karaan iyo in kale. Waa waddo guuleysan karta. Waa waddo sidoo kale burburi karta. Waana xaqiiqo ay dad badan ku adagtahay inay aqbalaan. Mararka qaar dadka waxay ula dhaqmaan shukaansiga sidii guur hore loo galay. Waxay bilaabaan lahaansho, xakameyn, iyo inay u dhaqmaan sidii qofka kale uu noqday hanti aan meel kale aadin karin. Laakiin runtu waxay tahay… Shukaansigu ma aha qof aad qabtid. Ma aha qof xorriyaddiisa kaa luntay. Ma aha xiriir kuu fasaxaya inaad ka qaaddo xasilloonidiisa, go’aamadiisa, ama naftiisa. Waa wada hadal. Waa is barasho. Waa laba qof oo maalin kasta dooranaya inay sii joogaan, ma aha laba qof oo khasab isku haysta. Taasi macnaheedu maaha inaan shukaansiga muhiimad la siin. Maya. Haddii aad qof la hadleyso adigoo niyad dhab ah leh, waxaa lagaa rabaa ixtiraam, daacadnimo, iyo caddeyn niyadeed. Laakiin isla waqtigaas waa inaad fahantaa in ilaa laga gaarayo ballan iyo masuuliyad cad, xiriirku wali yahay wax dhismi kara ama burburi kara. Waana sababta ay muhiim u tahay in qofku uusan lumin naftiisa, xasilloonidiisa, ama karaamadiisa xiriir aan weli meel rasmi ah gaarin. Qof jeceyl ha sii, ixtiraam sii, daacad u noqo… Laakiin ha iloobin xaqiiqadan: Shukaansigu waa wada hadal leh suurtagalnimo guul iyo guuldarroba. Ma aha lahaansho. Ma aha dammaanad. Mana aha qof aad gacanta ku haysato sida wax aan kaa tegi karin. - @d0.0.1