@qrnewskz: Мемлекет басшысы Қасым-Жомарт Тоқаев Алматы облысына жұмыс сапары барысында қоғамдық тәртіп пен қауіпсіздікті қамтамасыз ету мәселесіне тоқталды. Президент кейбір азаматтардың елдегі құқықтық бастамаларды сынап, Қазақстанды «Штрафстан», «Айыппұлстан» деп атайтынын айтты. Оның сөзінше, мұндай пікірлердің қатарында Парламент депутаттары да бар. «Кейбір елімізді жақтырмайтын, менсінбейтін кісілер, өкінішке қарай, солардың ішінде Парламент депутаттары бар, құқықтық әрекеттерімізді "Штрафстан", "Айыппұлстан" деп атайды екен. Мейлі, өз ойларының келтелігін көрсете берсін», – деді Мемлекет басшысы. Сонымен қатар Президент қоғам үшін қоғамдық тәртіп пен қауіпсіздіктің маңызы ерекше екенін атап өтті. «Ал халқымызға қоғамдық тәртіп пен қауіпсіздік керек. Сондықтан біз осы жолдан таймаймыз, батыл түрде "Заң мен тәртіп" саясатын жүргіземіз. Себебі бұл – халқымыздың талабы, халқымыздың сұранысы. Бүкіл қоғам да, әкімдер де бұл мәселеге баса назар аударуы керек», – деді Қасым-Жомарт Тоқаев. Мемлекет басшысы заң үстемдігін қамтамасыз ету, қоғамдық қауіпсіздікті күшейту және құқық бұзушылықтың алдын алу мемлекеттік саясаттың басым бағыттарының бірі болып қала беретінін жеткізді.

238947

7392

313

1778

To see more videos from user @qrnewskz, please go to the Tikwm homepage.