کاش دل بھی جسم کا کوئی عضو ہوتا... تو شاید اس کے زخم ایکسرے میں نظر آ جاتے، اس کی ٹوٹی ہوئی رگیں سل دی جاتیں اور محبت میں مرنے والوں کو قبرستان نہیں، ہسپتال لے جایا جاتا۔ مگر افسوس...دل نہ تو ہڈی ہے جو جڑ جائے، نہ گوشت ہے جو بھر جائے۔ یہ وہ قیدی ہے جو کسی ایک انسان کی یاد میں عمر قید کاٹ لیتا ہے۔ وہ بھی انہی لوگوں میں سے تھا جنہیں دنیا تندرست سمجھتی ہے۔ اس کے ہاتھ سلامت تھے، سانسیں چل رہی تھیں، چہرے پر مسکراہٹ بھی تھی، مگر حقیقت یہ تھی کہ وہ کئی برس پہلے مر چکا تھا۔ صرف اس کی موت کا اعلان باقی تھا۔ لوگ پوچھتے تھے، "کیا ہوا ہے؟" وہ کیا بتاتا کہ بیماری جسم میں نہیں، نام میں ہے۔ ایک ایسا نام جو زبان پر آئے تو آنکھیں بھیگ جائیں اور دل میں اترے تو سانس لینا مشکل ہو جائے۔ ایک دن کسی نے مشورہ دیا کہ ڈاکٹر کو دکھاؤ۔ وہ چلا گیا۔ طبیب نے نبض دیکھی، بخار چیک کیا اور چند رنگ برنگی گولیاں لکھ دیں۔ وہ نسخہ ہاتھ میں لیے دیر تک مسکراتا رہا۔ کیونکہ جو شخص ہر رات کسی کی یاد میں جلتا ہو، اسے پیراسیٹامول کیا شفا دے گی؟ جو کسی کی آخری "خیال رکھنا" میں پوری زندگی ہار آیا ہو، اسے وٹامن کی گولیاں کیا زندہ کریں گی؟ کچھ درد دواؤں سے نہیں جاتے۔ کچھ درد صرف اس شخص کے ساتھ دفن ہوتے ہیں جس نے وہ درد دیا ہو۔ اس کی راتیں عجیب تھیں۔ آنکھیں بند کرتا تو وہ سامنے آ جاتی۔ آنکھیں کھولتا تو اس کی کمی سامنے کھڑی ہوتی۔ یوں لگتا تھا جیسے پوری دنیا میں سب کچھ اپنی جگہ موجود ہے، بس ایک شخص کم ہے... اور وہ ایک شخص پوری دنیا کے برابر تھا۔ وقت گزرتا گیا۔ لوگ کہتے تھے وقت ہر زخم بھر دیتا ہے۔ مگر وقت جھوٹا ہے۔ وقت صرف انسان کو جینا سکھاتا ہے، بھولنا نہیں۔ وہ آج بھی اسے یاد کرتا ہے، مگر پہلے کی طرح روتا نہیں۔ شاید آنسو ختم ہو گئے ہیں، یا شاید درد اب اتنا پرانا ہو چکا ہے کہ آنکھوں تک آنے کے بجائے سیدھا روح میں اتر جاتا ہے۔ تب اسے سمجھ آیا کہ محبت کا سب سے خطرناک مرحلہ جدائی نہیں ہوتا... بلکہ وہ لمحہ ہوتا ہے جب انسان ہنس رہا ہوتا ہے، باتیں کر رہا ہوتا ہے، زندگی گزار رہا ہوتا ہے، مگر اندر کہیں ایک قبر برسوں سے آباد ہوتی ہے۔ اور اس قبر پر صرف ایک ہی نام لکھا ہوتا ہے۔ #foryou #foryoupage #viral #1millionaudition #fyppppppppppppppppppppppp - @hamidraza6099