صعدت بالطيارة .. بداية جديدة وناس جديدين وكل شيء جديد چان بشهر العاشر بوكتها نمت بالطيارة 4 ساعات گعدت صديقتي مخابرتني قبل ثلاث ساعات خابرتها (او ڤويسات ماتذكر صراحة) وحچينا شوية .. وبعد ساعتين وصلت نزلت من الطيارة وطلعت من المطار ماعرف وين اروح حرفيًا طفلة ضايعة ومنتظرة أهلها يلگوها بس أني لا طفلة ولا عندي أهل هستوني داطلع الموقع ع گوگل أجتني وحدة مبينة 26 سنة گلتلي أنت مو (..) كلتلها أيي گلتلي ايييي همزيننن لگيتچ گلتلها أنت من جماعة المحامي؟ گلتلي ايي يصير ابن عمي ووصاني عليچ رفعت حاجبي بشك (بداخلي خايفة منها) گلتلها خابري طلعت تلفونها وخابرته گالت، محمد هاك أحچي وياها أنطتني التلفون ورحت شوية مسافة علمود دا أحچي وياه گلتله وصلت وين أروح گلي شبيج (..) گلتله مادري خايفة لو أعرف ماورطت روحي هاي الورطة لو باقية أحسن گلي اصلا وصلني خبر أهلچ بحوشوا المحافظة كلها بس علمود يلگوچ هسة لو لاگينچ چان هسة شصار بيچ گلتله يعني هسة وين اروح گلي روحي وي امل (بنت عمه) گلتله مدري أخاف خاف تسويلي شي گلي تخافين مني؟ گلتله لا مثل أخوية گلي لعد هاي أعتبريها أختچ وصدگيني هي همين شوية ويطگها أكتئاب غيروا جو شوية وهمين لان ماعندچ مكان هسة وهي تعرف بالمكان لان سنتين عايشة هنا گلتله تمام شكرًا .. وغلقت المكالمة رحت لأمل وگلتلها هاا يلا خلنروح المهم ودتني للشقة مالتها شقة حجمها وسط يعني تكفي لثلاث أشخاص بس هي عايشة وحدها ومأثثة تأثيث حلو .. بيها حمام وغرفتين ومطبخ وصالة ودتني على غرفتها گلتلي خلي غراضچ هنا علما أسويلچ أكل راحت هي وخليت غراضي يم كنتورها وضميت فلوسي زين بالجنطة لان تبقى غريبة وبعدني ما أعرفها زين المهم صاحتني گلتلي تعالي خناكل رحت عليها لگيتها دا تنتظرني ، سوتلي اشياء خفيفة وانيهم مو كلش جوعانة .. المهم اكلنا وسولفنا وحرفيا نفس سوالف البنات وطلعت حبابة وسولفتلي قصتها وشلون أجت هنا .. وسولفتلها قصتي گلتلي محمد گلي تدورين على شغل گلتلها أيي شفت صباحي ومسائي گلتلي تمام لعد باچر نطلع ندورلچ وگالتلي هسة اسويلچ مجال بالكنتور وخلي غراضچ المهم لميت الاكل وهي داتسويلي مجال بالكنتور توني دا أغسل المواعين گلتلي ها ها ها روحي يمعودة تغسلين مواعين شنو ضحكت ورحت للغرفة وجذبني شي حلو بيهم أن كلهم متعاونين وطيبين وگلب على گلب ومابگلبهم حقد حتى عالغريب وكريمين خوما مثل أهلي المهم طلعت الغراض وحرفييياا هوسة من هوسة سويت ألمهم چان تلفونها موجود بالغرفة لعب بعقلي الشيطان وفتحته حرفيا كلما أتذكر احس بتأنيب ضمير المهم گلبت بي كلشي ماكو دخلت على محادثتها هي والمحامي وهاي گدامكم .. أبتسمت وسكرنتها بتلفوني .. أتوقع واضح گدامكم الهوسة عفت تلفونها وخليت الغراض بالكنتور .. وضميت الفلوس بمكان ماتوقع تگدر تشوفه المهم نمنا انا وياها بنفس الغرفة مع الرغم اكو غرفة ثانية بالشقة بس ما مأثثة قابل وين أروح اني . أجة ثاني يوم ودورتلي على شغل وفعلا لگيت الشغل الاول الصباحي چنت بكافيه صغير وخوش راتب والثاني بليل چان بـ مول محل البسة نسائية وهيچ وهمين خوش راتب ثاني يوم بديت أشتغل وعلاقتنا انا وامل صارت علاقة خوات وتقربنا وطبعا صديقتي كليوم نسولف انا وياها وحتى مرات نفتح مكالمة ونسولف انا وياها وامل .. وحتى علاقتي ببنات گرايبها زادت وصرنا مقربين كلش طبعا بالكافيه چانت وياي بنية أجنبية وولدين واحد سعودي والخ أجنبي أبد ما أجيت يمهم ولا حچيت وياهم أصلًا واذا السعودي يريد يحچي وياي مادري يجيني أحساس بداخلي قرف واشمئزاز حرفيًا چان فد غثة ومينجرع ( ماقصد الاساءة قصدي بس عالولد ) چان بس يحاول يفتح سوالف وياي ويريد ياخذ معلومات وليش اجيتي هنا بس چنت مانطيه مجال لأن احس روحي خاينة .. ألمن داخون ما أعرف والأجنبي جان لطيف هو والبنية وانا همين أنكليزيتي فول الحمدلله همين ماچنت احچي وياهم حيل همين صرت أعرف بالمكان والمنطقة يعني ما اتيه اذا عافوني وحدي مر شهرين وانا هناك وحرفيا نفس الروتين بس ما أنكر اشتريت أشياء أحبها وملابس أحبها وتعجبني واكسسوارات وميكب براندات وحرفيا ماقصرت وي روحي وماخليت شي بنفسي أبد وهماتين چنة نطلع انا وأمل وبفترة امتحاناتها چنت اساندها المهم چنت احس بنقص وأشتياق ألمن ماعرف همين بس داحس بنفسي مشتاقة لأحد بس ماعرفه منو !!! المهم ورة فترة چان واحد من ولد عم امل دا يدوروله على مرة ف المهم گامت تسولفلي عليه وشنو مواصفاته وهيچ مادري شلون طلعت من حلگي وگلتلها خلي يتزوج (....) {صديقتي} والله چان تفتح عيونها گلتلي اييي والله صدك شلونن مافكرت بيها خاب دشو هاي راحت طيارة خابرت مرة عمها وكلتلها هيج وهيج وهيج وفعلًا راحوا خطبوها لصديقتي .. طبعًا صديقتي هي واهلها چانوا يريدون يتحولون على بغداد وبخطوبتها تحولوا وصار مسكنهم بغداد خطوبتها چانت 2024/2/14 طبعًا گلنا انا وأمل نروح على بغداد علمود ألخطوبة وهاي فعلًا حجزنا تذاكر ورحنا P10? #سفر #صديقات #اجانب #محامي #عراق - @lucky.1_0