@user2819609991381: မေး - မြတ်စွာဘုရားရှင် မရှိတော့တဲ့ ယနေ့ခေတ်သာသနာမှာ ရဟန်း ဝိနည်းတွေကို ခေတ်နဲ့အညီ နားလည်ပေးရမယ် အခက်အခဲများကို ပြုပြင်သင့်တာတွေလို့ မထင်ဘူးလား အရှင်ဘုရား။ ဖြေ - ပြုပြင်စရာမလိုပါဘူး။ ဦးဇင်းတို့ ဒီဝိနည်းတော်တွေက သဗ္ဗထပညတ်တိလို့ခေါ်တယ်လေ ဘယ်ခေတ်ရောက်ရောက် ဘယ်နေရာရောက်ရောက် ကျင့်ရမယ့် ဝိနည်းသာဖြစ်ပါတယ် နော်။ ပယ်ရမယ့်ဟာ တစ်ခုမှ မရှိဘူးလေ။ ဒါကြောင့် ဦးဇင်းတို့ ပထမ သင်္ဂါယနာတင်တုန်းက အရှင်အာနန္ဒာက လျှောက်တယ်လေ မြတ်စွာဘုရားကတဲ့ ပရိနိဗ္ဗာန်စံခါနီးမှာ ခုဒ္ဒါနု ခုဒ္ဒကသိက္ခာပုဒ်လို့ခေါ်တဲ့ ငယ်ရွယ်တဲ့ သိက္ခာပုဒ်တွေကို ပယ်လိုက ပယ်လို့ မြတ်စွာဘုရားမိန့်ခဲ့ပါတယ်ဆိုပြီးတော့ အရှင်အာနန္ဒာက လျှောက်တော့ အဲဒီမှာ အရှင်မဟာကဿပ အမှူးရှိတဲ့ ရဟန္တာတွေက ပယ်ဖို့ အလိုမရှိဘူးလို့လေ။ ဘာလို့ဆိုတော့ အကြောင်းပြချက် နှစ်ချက်ပြတယ် အဌကထာထဲမှာ နံပါတ်(၁)ကတော့ ဒီဝိနည်းတော်တွေဟာ ပယ်စရာ တစ်ခုမှ သူမတွေ့ဘူးပေါ့နော်။ ဘာကိုပယ်လိုက်ရမလဲ ပယ်စရာကိုမတွေ့တာ ဘုရားက လိုအပ်လို့ ပညတ်ခဲ့တာလေ လိုအပ်လို့ ပညတ်ခဲ့တာတွေဆိုတော့ ပယ်စရာ မရှိဘူးပေါ့လေ။ နံပါတ်(၂) ကတော့ ပယ်လိုက်မယ်ဆိုလို့ရှိရင် သူများပြောစရာဖြစ်လာမယ်နော် ဂေါတမရဲ့ တပည့်တွေက ဘုရားပရိနိဗ္ဗာန်စံတာတောင် မကြာသေးဘူး သူရဲ့ တပည့်သားတွေက သူ့ရဲ့ ဥပဒေတွေကို ဖျက်နေကြပြီဆိုပြီးတော့ လူပြော သူပြောလည်းဖြစ်လာစရာရှိတယ် အဲ့တော့ ဘုရားပေါ်မှာ ရိုသေလေးစားမှု ရှိတယ်ဆိုတဲ့ဟာကိုလည်း ပြချင်တာ အရှင်မဟာကဿပတို့ကလေ။ ဘုရားပေါ်မှာလည်း အလွန်ရိုသေလေးစားတဲ့ အတွက်ကြောင့် ဘုရားရဲ့ ဥပဒေကို ဘာမှ မပယ်ဘဲနဲ့တစ်သွေမတိမ်းကျင့်ကြတယ်ပေါ့ ဥပမာ-မိဘ စကားနားထောင်တဲ့ သားသမီးလိုပေါ့ မိဘတွေက မှာခဲ့တယ် ဟေ့ နင်တို့တွေ စာကျက်ကြနော် ငါတို့ အပြင်သွားလိုက်ဦးမယ်ဆို အဲ့တော့ မိဘတွေက အပြင်ထွက်သွားတယ် သားသမီးတွေက မိဘမှာခဲ့တဲ့အတိုင်း အိမ်မှာ သေချာစာကျက်တယ်ဆိုလို့ရှိရင် ဒါမိဘ စကားနားထောင်တဲ့ သားသမီးဂုဏ်ရှိတယ်ပေါ့နော် အဲ့သဘောပဲနော် မိဘကစာကျက်ပါလို့ပြောခဲ့တယ် ကလေးက စာမကျက်ဘူး ဂိမ်းဆော့နေမယ် ဗီဒီယို ကြည့်နေမယ်ဆိုရင် ကွယ်ရာမှာကျမိဘ စကားကို နားမထောင်တာ ။ အဲ့တော့ အရှင်မဟာကဿပ အစရှိတဲ့ မထေရ်မြတ်တွေက အဲ့လိုမျိုး အဖြစ်မခံနိုင်ဘူး။ ဘုရားရှင် မရှိသော်လည်းပဲ ငါတို့ တပည့်တွေက စည်းစည်းလုံးလုံးနဲ့ ဗုဒ္ဓရဲ့ ဥပဒေတွေကို တစ်သွေမတိမ်း လိုက်နာနေကြတုန်းပဲဆိုတာကိုပဲ အရှင်မဟာကဿပတို့က လိုချင်တာလေ။ ဒါကြောင့် အရှင်မဟာကဿပတို့က ဒီခုဒ္ဒါနု ခုဒ္ဒကလိုခေါ်တဲ့ ဝိနည်း သိက္ခာပုဒ်ငယ်တွေကို ပယ်ဖို့ လုံးဝ အလိုမရှိခဲ့ကြဘူး။ မပယ်ဖို့အတွက်လည်း ဒါ သေသေချာချာ ကမ္မဝါစာတွေဖတ်ပြီး တားမြစ်ခဲ့ကြတယ်။ ရှေးရှေး ရဟန္တာ မထေရ်မြတ်ကြီးတွေကတောင် ဒါကြီးကို ပယ်စရာလို့ မထင်ခဲ့တဲ့ ဥစ္စာကို ဦးဇင်းတို့ ဘာဖြစ်လို့ ပယ်ဖို့လိုအပ်သေးသလဲပေါ့နော်။ ကိုယ့်ဘက်က မကျင့်နိုင်လို့သာ ပယ်ချင်စိတ်ပေါ်နေကြတာလေ။ ကျင့်လို့ မရတဲ့ ဝိနည်းရယ်လို့ ဒီခေတ်မှာရှိမှ မရှိတာ။ ဟုတ်လား..? ဘယ်ဝိနည်းကြီးကတော့ ဒီခေတ်ကြီးမှာ ကျင့်လို့ မရပါဘူး ဆိုတာရှိကိုမရှိတာ ကိုယ်မကျင့်ချင်တာနဲ့ မကျင့်နိုင်တာပဲရှိတာ။ ကျင့်လို့ မရတာမရှိဘူး ဘယ်ဝိနည်းကတော့ ဒီခေတ်ကြီးမှာ ကျင့်လို့မရပါဘူးဆိုတာ ရှိကိုမရှိတာ နော်...။ အဲတော့ မကျင့်ချင်တာရယ် မကျင့်နိုင်တာရယ် ဒီနှစ်ခုပဲရှိတာ မကျင့်ချင်တာရယ် မကျင့်နိုင်တာကို အကြောင်းပြပြီးတော့ ပယ်ဖို့ကြိုးစားကြတာပေါ့နော်။ ဆရာတော်အရှင်အဘယာလင်္ကာရ (မဟာဝိဟာရကျောင်းတိုက်) #ကောင်းမှုတစ်ခုနေ့စဉ်ပြု ဓမ္မဝိနယ Ye Htun And Charity Partners