တစ်နေ့ကိုလည်း သေရမည့်လူ တစ်နေ့ကိုလည်း သေရမည့်လူမို့ မာန်မာနတွေနဲ့ မိုးထိအောင်မတက်ချင်ဘူး၊ အသက်ရှင်နေစဉ် ခဏတာအတွင်းမှာ လူသားဆန်တဲ့ နှလုံးသားတစ်စုံကိုသာ အဖိုးတန်ဆုံးအရာအဖြစ် သိမ်းထားချင်တယ်။ မနက်ဖြန်ဆိုတာ မသေချာသလို နောက်တစ်နာရီတောင် ကိုယ့်အတွက် ရှိမရှိ မသိနိုင်ဘူး၊ ဒါကြောင့် မုန်းတီးမှုတွေကို မဖက်တွယ်ချင်တော့ဘူး၊ စိတ်နာစရာတွေကိုလည်း ရင်ဘတ်ထဲမှာ အလေးအပင်အဖြစ် မသယ်ဆောင်ချင်တော့ဘူး။ တစ်နေ့ကိုလည်း သေရမည့်လူမို့ ချစ်ရသူတွေကို ချစ်တယ်လို့ ပြောဖို့ မနှောင့်နှေးချင်ဘူး၊ တောင်းပန်သင့်တဲ့အခါ တောင်းပန်မယ်၊ ခွင့်လွှတ်သင့်တဲ့အခါ ခွင့်လွှတ်မယ်၊ အချိန်က ဘယ်သူ့ကိုမှ စောင့်မနေဘူးဆိုတာ သေချာနားလည်လာခဲ့လို့ပါ။ ငွေကြေးတွေ၊ ဂုဏ်ပကာသနတွေ၊ လက်ခုပ်သံတွေ ဘယ်လောက်များနေပါစေ၊ နောက်ဆုံးအချိန် ရောက်လာတဲ့အခါ ယူသွားနိုင်တာ ဘာတစ်ခုမှ မရှိဘူး၊ ကျန်ရစ်မယ့်အရာက ကိုယ်ပြုခဲ့တဲ့ ကောင်းမှုနဲ့ ကိုယ်ပေးခဲ့တဲ့ မေတ္တာတွေပဲ ဖြစ်တယ်။ တစ်နေ့ကိုလည်း သေရမည့်လူမို့ ရှုံးနိမ့်မှုတွေကို မကြောက်တော့ဘူး၊ ကျရှုံးခြင်းဟာ ဘဝရဲ့ အဆုံးမဟုတ်ဘဲ လက်လျှော့လိုက်ခြင်းကသာ အဆုံးဖြစ်တယ်ဆိုတာ သင်ယူထားပြီးသားမို့ပါ။ လောကကြီးထဲကို လက်ဗလာနဲ့ ရောက်လာခဲ့သလို လက်ဗလာနဲ့ပဲ ပြန်သွားရမယ်၊ ဒါပေမယ့် သွားရမယ့်နေ့ရောက်လာတဲ့အခါ "ငါ အသက်ရှင်ခဲ့တာ အဓိပ္ပာယ်ရှိခဲ့တယ်" လို့ ကိုယ့်ကိုယ်ကို ပြန်ပြောနိုင်ဖို့တော့ လိုတယ်။ တစ်နေ့ကိုလည်း သေရမည့်လူမို့ နေ့ရက်တိုင်းကို တန်ဖိုးထားမယ်၊ တွေ့ဆုံမှုတိုင်းကို မြတ်နိုးမယ်၊ ချစ်ခြင်းမေတ္တာကို မျှဝေမယ်၊ အမှန်တရားကို လက်ကိုင်ထားမယ်။ အကြောင်းကတော့ ဘဝဆိုတာ ထာဝရမဟုတ်ဘူး၊ လူဆိုတာလည်း ထာဝရမဟုတ်ဘူး၊ ဒီနေ့ ရှိနေသူဟာ မနက်ဖြန် မရှိတော့နိုင်သလို ဒီနေ့ ပြုံးနေသူဟာ မနက်ဖြန် အမှတ်တရတစ်ခုသာ ကျန်ရစ်နိုင်တယ်။ ဒါကြောင့်... တစ်နေ့ကိုလည်း သေရမည့်လူမို့ မေတ္တာထားပြီး နေထိုင်ပါ၊ ကောင်းမှုတွေ ပြုလုပ်ပါ၊ အချိန်ကို တန်ဖိုးထားပါ၊ အသက်ရှင်နေသည့် နေ့ရက်တိုင်းကို အဓိပ္ပာယ်ရှိအောင် ဖြတ်သန်းပါ။ အဆုံးမှာ ကျန်ရစ်မယ့်အရာက အသက်ရှည်ခဲ့ခြင်း မဟုတ်ဘဲ၊ ဘယ်လောက် အဓိပ္ပာယ်ရှိရှိ ရှင်သန်ခဲ့သလဲ ဆိုတဲ့ အမှတ်တရတွေပဲ ဖြစ်လို့ပါ။ - @izl077