الوعد حاجة غريبة شديد، مرات كلمة واحدة بتديك أمل تعيش بيهو شهور، ومرات نفس الكلمة بتخليك تسهر الليالي كلها وانت مستني حاجة عمرها ما ح تجي. عشان كدا بقولوا الوعد ما مجرد كلام بيتقال، الوعد مسؤولية، وأمانة، وحاجة لو ما كنت قدرا ما تقولها من الأساس. كم مرة سمعنا كلام جميل وصدقناهو من كل قلبنا؟ كم مرة اتعلقنا بوعد واتخيلنا الأيام الجاية كلها على أساس إنو ح يتحقق؟ قعدنا نرسم أحلامنا، ونرتب خططنا، ونحسب الأيام الباقية، وفي النهاية لقينا روحنا واقفين في نفس المكان، والوعد بقى مجرد ذكرى موجعة. أصعب حاجة ما إنو الوعد ينكسر، أصعب حاجة الإحساس البجي بعدو. الإحساس البخليك تسأل نفسك: هل أنا كنت غبي؟ هل صدقت زيادة عن اللزوم؟ ولا المشكلة كانت في الزول الباع الأمل وهو عارف إنو ما قادر يحققو؟ مرات الناس بتفتكر إنو الوعد كلمة بسيطة، لكن الحقيقة إنو في وعود بتبني قلوب، وفي وعود بتكسر قلوب. في وعد ممكن يخلي زول يتحمل تعب سنين عشان منتظر نهاية جميلة، وفي وعد تاني لما يضيع يخلي كل التعب دا يروح هدر. وأوجع الوعود هي الوعود البتجي من الناس البنعزهم. لأنو الغريب لو خذلك بتزعل شوية وتمشي، لكن الزول القريب لما يخلف وعدو، بتحس إنو الحاجة الضاعت ما الوعد بس، الضاعت معاها الثقة والاطمئنان والحاجات الحلوة الكنت شايلها جواك ليهو. لكن برضو الحياة علمتني إنو ما كل الناس زي بعض. في ناس كلامها قليل، لكن وعدها حق. ناس يمكن ما يقولوا ليك كتير، لكن أول ما يدوك كلمة، تلقاهم واقفين عليها مهما كانت الظروف. والناس دي وجودها نعمة كبيرة في الدنيا، لأنها بتخليك لسه مؤمن إنو الصدق موجود، وإنو الوفاء ما مات. عشان كدا مع الزمن الواحد بتعلم حاجة مهمة: ما تتعلق بالكلام الكتير، اتعلق بالمواقف. لأنو الكلام ساهل، لكن الفعل هو البكشف حقيقة الناس. الزول البحبك بصدق ما ح يوعدك بكل حاجة، لكن الحاجة البوعدك بيها بيسعى ليها بكل قوتو. وفي النهاية، يمكن ما كل الوعود تتحقق، ويمكن بعض الأحلام تضيع في نص الطريق، لكن الأكيد إنو ربنا أرحم بينا من كل الناس. ولو ضاع وعد من زول، ربنا قادر يعوضك بحاجة أجمل وأفضل مما كنت منتظر. عشان كدا ما تزعل شديد على الوعد الانكسر، لأنو مرات انكسار الوعود بيفتح عيوننا على حقائق ما كنا شايفنها. ومرات الخيبة البتوجعنا اليوم، بتكون هي السبب في راحتنا بكرة. الوعود الحقيقية ما هي الكلام البتسمعو بأضانك، الوعود الحقيقية هي الأمان البتحسو في قلبك، والوفاء البتشوفو بعينك، والمواقف البتثبت ليك إنو في ناس لسه بتحترم الكلمة وبتعرف قيمتها.. مقــ⁷ــداد #خواطر_مقداد #خواطر #سودانيز_تيك_توك_مشاهير_السودان #سودانيز_تيك_توك_مشاهير_السودان🇸🇩 #جخو،الشغل،دا،يا،عالم،➕_❤_📝 - @megdadahmed22