@navat.satra.kh: នេះគឺទស្សន:វិជ្ជា អាហ្វហ្កានីស្ថាន “ទឹកទន្លេ មិនកខ្វក់ដោយសារជើងឆ្កែមួយក្បាលទេ”។ នៅពេលអានសុភាសិតនេះដំបូង វាហាក់បីដូចជាបង្កប់នូវវោហារដៀលត្មិះ ឬប្រមាថទៅលើសត្វសុនកបន្តិច។ នៅក្នុងផ្នត់គំនិតទូទៅ មនុស្សតែងតែយកសត្វសុនកមកប្រៀបប្រដូចទៅនឹងបុគ្គលអន្យតិរ្ថិយ (មនុស្សពាល)។ ប៉ុន្តែបើនិយាយតាមន័យត្រង់ សត្វវានៅត្រឹមជាសត្វ វាមិនដឹងខុសត្រូវអ្វីឡើយ (សភាវគតិ)។ អ្វីដែលគួរឱ្យពិចារណា គឺអត្ថន័យដែលនៅពីក្រោយទស្សន:មួយឃ្លានេះ។ ទឹកទន្លេធំធេងណាស់ កុំថាឡើយត្រឹមជើងឆ្កែមួយក្បាល ទោះបីជាមានច្រើនក្បាលក៏មិនអាចញ៉ាំងឱ្យទឹកទន្លេដ៏ថ្លាយង់ ល្អក់កករបានយូរអង្វែងដែរ។ នៅក្នុងជីវិតជាក់ស្តែង តើអ្វីទៅដែលតំណាងឱ្យ “ទឹកទន្លេ”? សម្រាប់ខ្ញុំ! ខ្ញុំប្រៀបប្រដូចទឹកទន្លេទៅនឹង “ឆន្ទៈ គោលដៅ មហិច្ឆតា វិជ្ជា និងសេចក្តីសប្បុរស”។ រីឯ “ជើងឆ្កែ” វិញ វាប្រៀបបានទៅនឹង “ពពួកអស្មិ” បុគ្គលអវិជ្ជមាន ឬរាល់ឧបសគ្គរំខានតូចតាចទាំងឡាយណា ដែលតែងតែព្យាយាមបង្កជាបញ្ហានៅក្នុងផ្លូវចិត្ត។ ពិតណាស់ “ទឹកទន្លេ មិនកខ្វក់ដោយសារតែជើងឆ្កែមួយក្បាលឡើយ”។ យ៉ាងណាមិញ មនុស្សដែលមានគោលដៅជីវិតច្បាស់លាស់ គេក៏មិនដែលចាត់ទុករឿងរ៉ាវអត់ប្រយោជន៍ ឬសម្តីឥតន័យរបស់បុគ្គលអវិជ្ជមាន ធ្វើជាឧបសគ្គមករារាំងដំណើររបស់គេនោះទេ។ បើអាចរំលងបាន គេនឹងរំលងភ្លាម ព្រោះពួកគេដឹងច្បាស់ថា បុគ្គលប្រភេទនោះមិនមានតម្លៃសមនឹងឱ្យពួកគេខាតពេលទៅប្រកាន់វែងឆ្ងាយឡើយ។ ភាពនឹងធឹងរបស់បុគ្គលមានសមត្ថភាព គឺឆ្លុះបញ្ចាំងតាមរយៈ “ការមិនទោមនស្សនឹងសម្ដីអវិជ្ជមាន ឬមិនល្អក់កករនឹងបញ្ហាល្អិតល្អោច”។ មនុស្សដែលមានសមត្ថភាពពិតប្រាកដ តែងតែមានខែលការពារផ្លូវចិត្តពីសម្តីអសុរោះ និងថាមពលអវិជ្ជមានទាំងពួង។ សម្រាប់ពួកគេ សម្ដីអវិជ្ជមានទាំងនោះគ្រាន់តែជា “ស្រមោចអង្រួនដើមឈើ” តែប៉ុណ្ណោះ។ បណ្ឌិតមិនដែលខ្វល់ខ្វាយចិត្តនឹងសម្តីបុគ្គលពាលឡើយ ប៉ុន្តែអ្វីដែលគួរឱ្យអស់សំណើចទៅវិញនោះគឺ បុគ្គលពាលទាំងនោះតែងតែមានអំនួតខុសរឿង ហើយច្រឡំថា “ភាពស្ងប់ស្ងាត់ និងមិនប្រតិកម្ម” របស់បណ្ឌិត គឺជាការខ្លាចរអា និងការចុះចាញ់ចំពោះអំណាចរបស់ខ្លួនទៅវិញ។ ធាតុពិត មនុស្សប្រភេទនេះមានផ្លូវចិត្តទន់ខ្សោយបំផុត ពួកគេ “ឆាប់ច្រឡំ និងឆាប់ច្រឡោត”។ ពួកគេតែងតែបញ្ចេញប្រតិកម្មអវិជ្ជមាន និងជះកំហឹងទៅលើជនណាដែលពួកគេមិនពេញចិត្ត ហើយវាយតម្លៃដោយឆោតល្ងង់ថា ការច្រឡោតរបស់ពួកគេមានប្រសិទ្ធភាព នៅពេលឃើញម្ខាងទៀតមិនតបត។ ពួកគេប្រៀបដូចជាតួអង្គ “សត្វសុនក” ក្នុងទស្សន:នេះអ៊ីចឹង ដែលកំពុងមានមោទនភាពខុស ហើយគិតថាទឹកទន្លេទាំងមូល កំពុងល្អក់កករដោយសារតែជើងរបស់វា។ មានការពិតមួយដែលពួកគេមិនដែលដឹង ឬដឹងដែរ តែព្យាយាមបិទចិត្តមិនទទួលស្គាល់ នោះគឺការប្រតិកម្មច្រឡោតខឹងរបស់ពួកគេ បានត្រឹមតែជួយ “រំងាប់សេចក្តីក្រេវក្រោធខ្លួនឯង” មួយគ្រាតែប៉ុណ្ណោះ តែវាមិនអាចញ៉ាំងឱ្យជនជាបណ្ឌិត មួហ្មងជាមួយបានឡើយ។ វាគ្រាន់តែជាការបង្កើត “សុវត្ថិភាពផ្លូវចិត្តក្លែងក្លាយ” ដើម្បីលួងលោមចិត្តខ្លួនឯងថា ខ្លួនជាអ្នកឈ្នះ ខ្លួនជាអ្នកគ្រាន់បើ ខ្លួនជាអ្នកយល់ដឹង ទាំងដែលការពិត ខ្លួនកំពុងឈរត្រាំក្នុងភក់ជ្រាំនៃសេចក្តីអវិជ្ជាតែម្នាក់ឯង។ By: ណាវ៉ាត់៚ #សង្គម #quotes #ពន្លឺបញ្ញា #ទស្សនៈជីវិត

ណាវ៉ាត់៚ Proverbs

Open In TikTok:

Region: KH

Sunday 07 June 2026 07:18:40 GMT