မလိုအပ်ပဲ လျှာ မရှည်မိပါစေနဲ့ တခါက တိရစ္ဆာန်တွေ ပြောသောစကားတွေကို နားလည်တဲ့ တောင်သူကြီး တစ်ယောက်ရှိသတဲ့။ သူ့မှာ လယ်တွေလည်း အများကြီးပါတယ်။ သူ့လယ်ယာကိုလည်း သူ့နွားနဲ့ ထွန်ယက်စိုက်ပျိုးပါတယ်။ တစ်နေ့မှာ နွားတင်းကုပ်နံဘေးမှာ မြင်းနဲ့ နွား စကားပြောနေတာကို တောင်သူကြီးက ကြားသွားတယ်။ ဒါနဲ့ တောင်သူကြီးလည်း အကွယ်တစ်ခုကနေ နားထောင်နေတာပေါ့။ နွားကပြောတယ်..." ကိုမြင်း မင်းကတော့ အေးဆေးပဲကွာ သက်တောင့်သက်သာနဲ့ လှည်းလေး ဆွဲလိုက် ဟိုနည်းနည်း ဒီနည်းနည်း လုပ်လိုက်နဲ့ အဆင်ပြေနေတာပဲ။ စားရတော့လည်း ကောင်းကောင်းမွန်မွန် နေရတော့လည်းကောင်းမွန်စွာနဲ့ ဟန်ကျနေတာပဲ။ ငါ့မှာတော့ တစ်နေကုန် တစ်နေခမ်းရွှံ့နွံထဲမှာ တစ်နေကုန်ပဲ ရုန်းနေရတယ်..." " ဟုတ်မှာပေါ့ကွ... မင်းက သူများ ခိုင်းတာလုပ် ကျွေးတာစား ထားရာနေ စေရာသွားတော့ မင်းကို ခိုင်းမှာပေါ့ကွ။ ပြီးတော့ မင်းက နွားဆိုတော့ နွားကျလွန်းပါတယ်ကွာ။ မင်းကို ငါအကြံတစ်ခု ပေးမယ်။ နွားကလည်း စိတ်ဝင်တစားနဲ့...." ဟ ဘယ်လိုလည်း ကိုမြင်းရ ပြောပါဦး..." ငါပြောသလိုသာလုပ် မင်းကောင်းကောင်းလည်း နေရမယ် ကောင်းကောင်း စားရမယ်။ ဒီလိုကွ မင်းကိုလယ်ထွန်ခိုင်းရင် ပေကပ်ကပ်လုပ်နေလိုက် စာရင်းငှားကမင်းကို ခိုင်းဖို့ဆွဲလာရင် မသိချင်ယောင်ဆောင်နေလိုက်။ ဖယ်ကန်ကန်လုပ်နေလိုက် အဲ့ခါကျရင် စာရင်းငှားက တောင်သူကြီးကို ပြောလိမ့်မယ် ဗျိုး... တောင်သူကြီး ဒီနေ့ နွားက နေမကောင်းဘူးလား မသိဘူး။ ဆွဲလို့လည်းမရဘူး ခိုင်းလို့လည်းမရဘူး အဲ့ခါကျရင် မင်းတကယ်ကို သက်သာပြီး ငါပြောတဲ့အတိုင်းသာ လုပ်ကြည့် မင်းအတွက် အဆင်ပြေစေရမယ်။ နွားက မြင်းပြောသော စကားတွေကို တစ်လုံးမကျန်မှတ်သားထားပြီး နေလိုက်တယ်။ ထိုအခါမှာ မြင်းနဲ့နွားပြောနေသော စကားတွေအားလုံးကို တောင်သူကြီးကအကုန် မှတ်ထားလိုက်တယ်။ နောက်တစ်နေ့ မိုးလင်းလို့ လယ်ထွန်ဖို့အတွက်နွားကို နွားတင်းကုပ်ကနေ ဆွဲထုတ်တဲ့အခါ မနေ့က မြင်းပြောထားတဲ့အတိုင်း နွားက အကုန်လိုက်လုပ်တယ်။ နွားက မြင်းပြောထားတဲ့အတိုင်း ပေကပ်ကပ်နဲ့ ဖယ်ကန်ကန်လုပ်တယ်။ သုံးလေးငါးခါလောက် ဆွဲတယ် ဆွဲလို့ မရတဲ့အဆုံး တောင်သူကြီးကို အော်ပြောလိုက်တယ်... ဗျိုး...တောင်သူကြီး ဒီနေ့ နွား နေမကောင်းဘူးလား မသိဘူး အလုပ်ခိုင်းဖို နွားတင်းကုပ်ကနေ ဆွဲထုတ်တာ ဆွဲလည်းမရဘူး။ အဲ့ဒီအချိန်မှာ စာရင်းငှားက ပြောလိုက်တာကို တောင်သူကြီးက သိသွားပြီး ဒါဟာ မနေ့က မြင်းလက်ချက်ပဲဆိုတာကို သိသွားတယ်။ မြင်းကို ပညာကောင်းကောင်းပေးရမယ်လို့ စဉ်းစားလိုက်ပါတယ်။ အေးဒါဆိုလည်းကွာ နွားနေရာမှာ မြင်းကို အစားထိုးပြီး လယ်ထွန်ခိုင်းလိုက်လို့ တောင်သူကြီးက ပြောလိုက်တယ်။ တောင်သူကြီး ပြောတဲ့အတိုင်းပဲ စာရင်းငှားက မြင်းကို နွားနေရာမှာ လယ်ထွန်ခိုင်းလိုက်တယ်။ ထိုအခါမှာ မြင်းက စဉ်းစားတယ် ငါက နှာခေါင်းထက် လျှာက ရှည်သွားတာကိုး။ ခုတော့ သူ့နေရာမှာ ငါကရုန်းရတော့မယ်။ အစကတည်းက ငါ့နေရာမှာ ငါနေတာ ကောင်းပါလျက်နဲ့ ခုတော့ နွားကောင်းစားဖို့အတွက် ငါက အကြံပေးလိုက်တာကိုး။ ခုတော့ ငါ့ရှူး ငါပတ်ပြီး ငါပဲဒုက္ခရောက်ရတယ်။ ခုလိုတွေးရင်းနဲ့ မြင်းခမျာ နောင်တတွေ ရလို့ မဆုံးဖြစ်သွားတယ်။ ပြောချင်တာက သူတပါးကောင်းစားဖို့အတွက်နဲ့ တခါတလေမှာ ကိုယ်ကိုယ်တိုင်က ဒုက္ခတွေနဲ့ ကြုံတွေ့ရတာမျိုးတွေ ရှိတတ်ပါတယ်။ ဘယ်အရာမဆို နှာခေါင်းထက် လျှာရှည်တာက အလွန်ကို ဆိုးပါတယ်။ အလိုက်လည်းသိတယ် ကိုယ်ချင်းလည်းစာတယ် ဆိုပေမယ်လို့ တခါတလေမှာ ကိုယ့်နေရာလေးနဲ့ ကိုယ်သာ နေပေးလိုက်တာဟာ အကောင်းဆုံးပါပဲ။ အကြံပေးတာ တနည်းအားဖြင့် အကူအညီပေးတာဆိုပေမယ့် ကိုယ်ဒုက္ခရောက်မယ့် အဖြစ်မျိုးဆိုရင်တော့ ရှောင်ကြဉ်သင့်ပါတယ်။ ကူညီတာ ကောင်းတယ်ဆိုပေမယ့် တခါတလေမှာ တချို့အရာတွေက ကိုယ့်ကို ပြန်ပြီးဒုက္ခရောက်စေတတ်တာမို့ စဉ်းစားချင့်ချိန်ဉာဏ်နဲ့သာ လုပ်ဆောင်သင့်ပါတယ်....။ #တန်ဖိုး #ဘဝ #စိတ် #စာပေကြိုက်သူများ #ချစ်ခင်စွာဖြင့်ပြန်လည်မျှဝေသည် - @y.s.o458