@anaskhalifa1983: عذاب الـEye Contact.. ليه بنهرب بعنينا وإحنا بنتكلم؟ وإيه علاقته بالـADHD؟ 👁️💔 طول عمرنا اتربينا إن اللي بيهرب من عين اللي بيكلمه ده يا إما بيكدب، يا مش واثق من نفسه، يا إنسان قليل الذوق...أو عنده توحد. الجملة المشهورة "بص في عيني وأنا بكلمك" كانت بالنسبة لناس كتير مننا عبارة عن رعب يومي وجلد ذات مابينتهيش. قبل ما أفهم مخي والـADHD، كنت بدخل أي ميتنج وأبذل 100% من طاقتي الذهنية عشان بس "أمثل" إني طبيعي وباصص في عين الشخص. حوار داخلي مرعب: "أبص في عينه اليمين ولا الشمال؟ أنا عايز أبان مهتم بس إزاي؟ طب هو رَمَش، أرمش أنا كمان؟".. وفي الآخر أكتشف إني ماسمعتش ولا حاجة من اللي اتقالت! دلوقتي، خلينا نفك الشفرة دي ونفهم إيه اللي بيحصل وليه بنعمل كده: 🔸 علمياً (الذاكرة اتملت): العين مش مجرد عدسة، دي بحر من البيانات (تعبيرات دقيقة، لمعة عين، حركة). مخ الـADHD أصلاً زحمة، فلما تبص في عين حد وتسمعه في نفس الوقت، كأنك بتنزل فيلم 4K على باقة موبايل ضعيفة.. الجهاز هـ يهنج! فمخك بياخد قرار عبقري للنجاة: بيعمل "بلوك" بصري ويهرب بعينه، عشان يوفر مساحة في الذاكرة يقدر يسمع ويفهم بيها كلامك. 🔸 ثقافياً (رعب العيال): المشكلة فين؟ في مجتمعاتنا اللي بتربط الاحترام باختراق العين. الأب يزعق لابنه "حط عينك في عيني"، الطفل بيترعب ومخه بيقفل، فالأب يحكم عليه إنه خبيث. إحنا دمرنا ثقة شباب وبنات بسبب أحكام سطحية. 🔸 دينياً (سنة نبينا ﷺ): الناس اللي متمسكة بثقافة العيون.. النبي ﷺ كان إذا التفت التفت معاً (إقبال الجسد بالكامل للاهتمام)، بس في نفس الوقت كان "خافض الطرف"، نظره للأرض أطول من نظره للسماء. الاحترام بالقلب والإنصات، مش بإنك تخترق عين اللي قدامك وتجبره يبادلك ده. وغض البصر هنا راحة للنفس من زحمة المشتتات. إنت إنسان بتعافر عشان تركز، ودي قمة الاحترام. ارحموا نفسكم، ولو حد اتضايق منكم، قولوله بابتسامة وهدوء: "أنا مركز معاك جداً على فكرة، وبسمعك أحسن بكتير لما ماببصش في عينك". بحبكم في الله ❤️ أخوكم أنس ━━━━━━━━━━━━━━━ لو الفيديو ده لمس وجع جواك أو فادك، شاركه مع حد محتاج يسمعه.

أنس خليفة

Open In TikTok:

Region: MA

Tuesday 09 June 2026 17:53:26 GMT