Кечээ, 9-июнда президенттин Ош облусундагы ыйгарым укуктуу өкүлү Аманкан Кенжебаев Өзгөн районунун Кароол айыл аймагынын тургундары менен жолугушту. Президент Садыр Жапаровдун тапшырмасы менен өлкө аймактарында облус жетекчилеринин, шаар мэрлеринин, мамлекеттик райондук администрация башчыларынын, прокуратура, ички иштер органдарынын, жергиликтүү өз алдынча башкаруу органдарынын жетекчилеринин эл менен жолугушуулары өтүп жатат. Жолугушуу учурунда Мырза-Арык айылынын тургуну Элгиза Кыпчакпай кызы айыл өкмөт башчысынын, социалдык адистин шылдыңына кабылганын айтып чыкты. Элгиза Кыпчакпай кызы: - Жаш ата-энелердин атынан айтайын. Көп балалуу ата-энелер жөлөк пул ала албай жатабыз. Жөлөк пул боюнча президент келгенде да бардым. Кат дагы келди. Айгүл, өкмөт башчысынын орун басаы, Жеңиш деген олтурат. Өкмөт өзү да отурат. Мени «бага албасаң эмнеге төрөйсүң, төрөбөгүн» деп чыгарышты. Жөлөк төлөп бербейбиз дешти. Айыл өкмөт башчынын орун басары «мен кол койсом гана жөлөк пул аласың» деген. Айыл өкмөт башчыдан жардам болуп калабы деп, ага да кирдим. Өкмөт айтты, «ушунчалык муктаж болсоң, группага таштап, 100 сомдон чогултуп, жардам кылып берейин» деп мени шылдыңдап чыгарышты. 6 балам бар. Кайын атам 1-топтогу майып. Кайын энем дагы жакшы басалбайт. Балдарды багыш үчүн төрөп эле балдарды ошолорго таштап, базарга чыгам. Иштебесем, алар ачка калат. Мигрант болуп да жүрдүк. Азыр жөлөк пулду тааныш-билиш, тууган-урук алып калган. Азыр 80 пайыз жаш ата-энелерде ушул көйгөй. Кароол айыл өкмөтү жакшы иштебейт. Кечээ президент келгенде өкмөт өзү чуркады артымдан. Социалдык коргоо бөлүмү «сыртка чыгыңыз» деп чакрып жатат. Чоңдор келгенде гана жакшы иштеп калат. Башка убакта иштебейт. Үйдү сурайт. Кызыл китеп алып барсаң, «Мындай үйдө биз да жашабайбыз. Мындай үйү барларга жөлөк пул чыкпайт» дейт. Үйү жок барсаң, кызыл китеп сурайт. 100 миңди сураш үчүн да баргам. Базарда да түртүндү 1 метр жерде иштейм. Аманкан Кенжебаев: - Айыл өкмөттүн соцкызматкерлери жөлөк пул бербейт, аныктама гана берет. Соцалдык адис: - Биз текшергенибизде жолдошунун «Мерседес-Бенц Спринтер» унаасы бар. Эжеке өзү базарда отурат. Элгиза Кыпчакпай кызы: - Кайын атам ооруп калгандыктан жолдошуп ушул жерге келип, 3 жылга 2 миллион сом кредит алып, азыр төлөп жатат. Өзгөн районунун акими Каныбек Апбасов: - Карындашым 7200 сомго эми мыйзам талабында жүрүш керек да. Социалдык адистен ошондой мамиле болдубу? Социалдык адис: - Биз мониторинг жүргүзгөнбүз. Комиссиянын актысы менен жашоо шарты жакшыртылган. Эшигинин алдында жеңил унаасы бар. Өзү базарда иштейт. Сага антип айткан эмеспиз. Каныбек Апбасов: - Жөлөк пулдун өзүнүн талаптары бар. Бериле турган жөлөк пулду сизге бербей койсо, прокуратура, УКМК, баары турат. Сиз да туура түшүнүңүз. Талапка туура келсе берет. Жооп бербесе эле берип алса, мамлекеттин акчасын туура эмес пайдалануу болуп, анда да жоопкерчиликке тартылып калышат. Ошону да туура түшүнүш керек. - @turmush.kg_