@mokhbir.eqtisadi1: ركزوا معانا وهنفاجئكم بمعلومات غريبة جدًا!🤯 خلونا نسألكم الأول سؤال مختلف شوية ويمكن جديد على عقول عدد كبير منكم؛ مين أكتر ناس على كوكب الأرض بيستغلوا إنه ربنا أنعم علينا بنعمة عظيمة اسمها الشمس؟ أو خلونا نسألكم السؤال ده بصيغة تانية: مين أشطر ناس في العالم بيحصدوا الشمس؟🌞 وأيوة حضراتكم قرأتم التعبير صح "حصاد الشمس"!! هل حد فيكم فكر في إجابة السؤال العجيب ده قبل كده؟🤔 فيه جزء في العالم اسمه صحراء أوردوس Ordos Desert، الصحراء دي شاسعة وموجودة على هضبة معروفة بنفس الاسم Ordos plateau.. الجزء ده من العالم موجود بقاله عشرات الآلاف من السنين، ولحد سنة 2015 لو بصيتوا عليه بأي شكل، سواء بالعين أو بالأقمار الصناعية الحديثة، هتلاقوه صحرا زي ما هو.. فيه منطقة في الصحراء دي مساحتها أكتر من 46 ألف هكتار، يعني على الأقل 460 كم مربع، تقريبًا قد مدينة نصر في القاهرة مرتين..😲 مساحة شاسعة يعني.. المنطقة دي، في العشر سنين اللي فاتوا، من 2015 لحد 2026، تحولت لمنطقة بتلمع ومغطاة باللون الأسود لو بصينا علينا دلوقتي بالأقمار الصناعية! إيه اللون ده؟ والمنطقة دي فين؟ وإيه علاقتها بالسؤال اللي بدأنا بيه كلامنا؟ قدرتوا تخمنوا؟👀 اللون ده هو لون مزارع طاقة شمسية من الفضاء، والمنطقة دي موجودة في شمال مصنع العالم: جمهورية الصين الشعبية.. وإجابة السؤال اللي بدأنا بيه كلامنا "مين أكتر حد بيستفيد من الشمس في العالم؟" هو الصين برضو! الصين، في ظرف 20 سنة بس، حولت نفسها للقوة العظمى العالمية في مجال الطاقة النظيفة! إحنا مش بنتكلم يا جماعة عن أرقام عادية، وإنما بنتكلم عن أرقام إعجازية بلا مبالغة!!🚀 بنتكلم عن البلد اللي ركبت في سنة 2024 توربينات رياح وألواح طاقة شمسية أكتر من اللي ركبته دول العالم كله مجتمعة! واللي بتنتج طاقة شمسية بس قد كل الكهربا اللي بتستهلكها دولة عملاقة زي #الهند في يومين كاملين! واللي فيها أكتر من 70% من إجمالي العاملين في الطاقة الشمسية في العالم! واللي بتصنع وتركب أكتر من 100 خلية طاقة شمسية في الثانية الواحدة! مش في اليوم، ولا الساعة، في الثانية!!😱 الصين.. اللي العالم يعرفها بأكبر ملوث للكوكب مع الولايات المتحدة، بقت هي أكبر منتج للطاقة النظيفة على نفس الكوكب ده، وبفارق مهول عن كل دول العالم مع بعض، مش كل دولة لوحدها.. إزاي الصين وصلت للمستوى ده من الهيمنة على واحد من أخطر مجالات الطاقة في العالم؟ ليه أصلًا سعت لتحقيق الهيمنة دي؟ وإزاي بقرار استراتيجي واحد من عشرين سنة بتغير مستقبل العالم كله حاليًا؟🤔 حلقة مهمة جدًا وجديدة ومختلفة وفيها تفاصيل الطفرة الصينية المذهلة، لازم تشوفوها، رابط في البايو وعرفونا في التعليقات؛ تفتكروا فيه دولة عربية تقدر تكون حصان أسود في سباق الطاقة النظيفة وتتفوق فيه وتوفر لنفسها ولجيرانها إمدادات طاقة مهولة؟ ولا لأ؟ وليه؟💬 #المخبر_الاقتصادي #الصين #SolarEnergy #RenewableEnergy
