@tanhayyy44: لەم سووچە تاریکەی تەمەن، سەیری سەراپای خۆم دەکەم؛ من بێنازترین مێوانی ئەم سەرزەمینەم. بێناز لە خۆم، لە کات، لە شوێن، بێناز لەو هەناسەیەی دێت و ناچێتە سەر، بێناز لەو بارانەی دەبارێت و خۆڵی سەر دڵم ناشواتەوە. سەیری ئاسمان دەکەم، مانگ وەکوو من سارد و تەنیایە، ئەستێرەکان چاو لێک دەنێن و کەس نییە چیرۆکی شەونخونییان بۆ بگێڕێتەوە. ئەم زەمینە پان و بەرینە، بۆ من بووە بە قەفەسێکی تەنگ؛ تەنانەت ڕێگاکانیش بێنازن، ڕێبوارێکیان نییە بە شەوقەوە پێیاندا بڕوات، هەموو تەنیا بۆ گەیشتن بە مەرگ تەقەلا دەکەن. پەنا دەبەمە بەر وشە، بەڵام وشەکانیش لە سەر کاغەزەکەدا ماتەمینیان گێڕاوە. پیتەکان بێنازن و باوەشیان بۆ ناکرێتەوە، دێڕەکان کڕنۆش بۆ بێدەنگی دەبەن. شیعر کە ڕۆژێک دەرمانی دەردی دڵ بوو، ئێستا خۆی بریندارێکی بێنازە لە گۆشەیەکدا؛ نە دەنگێک هەیە بیخوێنێتەوە، نە دڵێک هەیە لە قووڵایی کێش و سەرواکانی تێبگات. لە ناو ئاپۆرەی خەڵکدا دەڕۆم، هەزاران چاو دەبینم، بەڵام هەموویان کوێر لە بینینی ناخ؛ مرۆڤەکان بوونەتە سێبەری یەکتر، دڵەکان لە ئاسن و سنگەکان لە بەرد. عەشق، ئەو ناوە پیرۆزەی جارمەن، ئێستا لە سەر جادەکاندا سەیلاو بردوویەتی، بووە بە کاڵایەکی بێناز و غەریب، کەس نییە بە پاکی دەستی پیا بھێنێت. هەموو شتێک غەریبە، هەموو شتێک بێنازە، کاتێک ڕۆح لە ناو خۆیدا کۆچ دەکات و نیشتمانێک شک نابات بۆ حەوانەوە. تەنانەت مردنیش، کە دوا وێستگەی ئەم هەموو بێنازییەیە، بۆ من ناڕەزایەتی پێوە دیارە. من لێرەم، لە نێوان بوون و نەبووندا، پڕ لە هەوار و پڕ لە بێدەنگی. بێنازم لە ڕابردوو کە ڕۆیی و ئاوڕی نەدایەوە، بێنازم لە داهاتوو کە بە تەمومژەوە چاوەڕێمە. من بێنازترین هێمای ئەم گەردوونەم، کە تەنانەت سێبەرەکەشم لەبەر تیشکی مانگدا، هەنگاوێک لە دواوەی خۆمەوە دەڕوات...

چـۆڵستان،

Open In TikTok:

Region: IQ

Friday 12 June 2026 00:58:01 GMT